Ulinzi wa Mungu kwa Mji na Watu Wake

¹Mungu kwetu sisi ni kimbilio na nguvu,

Msaada utakaoonekana tele wakati wa mateso.

²Kwa hiyo hatutaogopa ijapobadilika nchi,

Ijapotetemeka milima moyoni mwa bahari.

³Maji yake yajapovuma na kuumuka,

Ijapopepesuka milima kwa kiburi chake.

⁴Kuna mto, vijito vyake vyaufurahisha mji wa Mungu,[#Isa 8:7; Ufu 22:1; 2 Nya 6:6; Zab 48:1; Isa 60:14; Ebr 12:22]

Patakatifu pa maskani zake Aliye juu.

⁵Mungu yu katikati yake hautatetemeshwa;[#Kum 23:14; Isa 12:6; Eze 43:7]

Mungu atausaidia asubuhi na mapema.

⁶Mataifa yalighadhibika, falme zikataharuki;

Alitoa sauti yake, nchi ikayeyuka.

⁷BWANA wa majeshi yu pamoja nasi,

Mungu wa Yakobo ni ngome yetu.

⁸Njoni myatazame matendo ya BWANA,

Jinsi alivyofanya ukiwa katika nchi.

⁹Avikomesha vita hata mwisho wa dunia;

Avunja uta, akata mkuki, achoma moto magari.

¹⁰Acheni, mjue ya kuwa Mimi ni Mungu,

Nitakuzwa katika mataifa, nitakuzwa katika nchi.

¹¹BWANA wa majeshi yu pamoja nasi,

Mungu wa Yakobo ni ngome yetu.