Sala ya Utakaso na Msamaha

¹Ee Mungu, unirehemu,[#Kol 2:14]

Sawasawa na fadhili zako.

Kiasi cha wingi wa rehema zako,

Uyafute makosa yangu.

²Unioshe kabisa na uovu wangu,[#Eze 36:25; Zek 13:1; 1 Kor 6:11; Ebr 9:14; 1 Yoh 1:7; Ufu 1:5]

Unitakase dhambi zangu.

³Maana nimejua mimi makosa yangu[#Zab 32:5]

Na dhambi yangu i mbele yangu daima.

⁴Nimekutenda dhambi Wewe peke yako,[#Rum 3:4; Lk 15:21; Mwa 39:9]

Na kufanya maovu mbele za macho yako.

Wewe ujulikane kuwa una haki unenapo,

Na kuwa safi utoapo hukumu.

⁵Tazama, mimi naliumbwa katika hali ya uovu;[#Ayu 14:4; Yn 3:6; Rum 5:12]

Mama yangu alinichukua mimba hatiani.

⁶Tazama, wapendezwa na kweli iliyo moyoni;

Nawe utanijulisha hekima kwa siri,

⁷Unisafishe kwa hisopo nami nitakuwa safi,

Unioshe, nami nitakuwa mweupe kuliko theluji

⁸Unifanye kusikia furaha na shangwe,

Mifupa uliyoiponda ifurahi.

⁹Usitiri uso wako usitazame dhambi zangu;

Uzifute hatia zangu zote.

¹⁰Ee Mungu, uniumbie moyo safi,[#Mit 20:9; Yer 13:27; Eze 11:19; Mdo 15:9; Efe 2:10]

Uifanye upya roho iliyotulia ndani yangu

¹¹Usinitenge na uso wako,[#Mwa 4:14; Eze 36:27; Rum 8:9]

Wala roho yako mtakatifu usiniondolee.

¹²Unirudishie furaha ya wokovu wako;[#Rum 8:15; 2 Kor 3:17]

Unitegemeze kwa roho ya wepesi.

¹³Nitawafundisha wakosaji njia zako,

Na wenye dhambi watarejea kwako.

¹⁴Ee MUNGU, Mungu wa wokovu wangu,

Uniponye na damu za watu,

Na ulimi wangu utaiimba haki yako.

¹⁵Ee Bwana, uifumbue midomo yangu,

Na kinywa changu kitazinena sifa zako.

¹⁶Maana hupendezwi na dhabihu, au ningeitoa,

Wewe huridhii sadaka ya kuteketezwa.

¹⁷Dhabihu za Mungu ni roho iliyovunjika;

Moyo uliovunjika na kupondeka,

Ee Mungu, hutaudharau.

¹⁸Uitendee mema Sayuni kwa radhi yako,

Uzijenge kuta za Yerusalemu.

¹⁹Ndipo utakapopendezwa na dhabihu za haki,[#Mal 3:3]

Na sadaka za kuteketezwa, na kafara.

Ndipo watakapotoa ng’ombe

Juu ya madhabahu yako.