Sifa na Hakikisho katika Mateso

¹Unirehemu, Ee Mungu, unirehemu mimi,[#Isa 26:20]

Maana nafsi yangu imekukimbilia Wewe.

Nitaukimbilia uvuli wa mbawa zako,

Hata misiba hii itakapopita.

²Nitamwita MUNGU Aliye juu,[#Zab 138:8]

Mungu anitimiziaye mambo yangu.

³Atapeleka toka mbinguni na kuniokoa,[#Zab 144:5; 40:11]

Atukanapo yule atakaye kunimeza.

Mungu atazipeleka

Fadhili zake na kweli yake

⁴Nafsi yangu i kati ya simba,[#Mit 30:14; Zab 64:3]

Nitastarehe kati yao waliowaka moto.

Wanadamu meno yao ni mikuki na mishale,

Na ndimi zao ni upanga mkali.

⁵Ee Mungu, utukuzwe juu ya mbingu,[#Zab 108:5]

Na juu ya nchi yote uwe utukufu wako.

⁶Wameweka wavu ili kuninasa miguu;[#Zab 9:15]

Nafsi yangu imeinama;

Wamechimba shimo mbele yangu;

Wametumbukia ndani yake!

⁷Ee Mungu, moyo wangu u thabiti,[#Zab 108:1]

Moyo wangu u thabiti.

Nitaimba, nitaimba zaburi,

⁸Amka, utukufu wangu.[#Amu 5:12]

Amka, kinanda na kinubi,

Nitaamka alfajiri.

⁹Ee Bwana, nitakushukuru kati ya watu,

Nitakuimbia zaburi kati ya mataifa.

¹⁰Maana fadhili zako ni kubwa hata mbinguni,[#Zab 108:4]

Na uaminifu wako hata mawinguni.

¹¹Ee Mungu, utukuzwe juu ya mbingu,

Na juu ya nchi yote uwe utukufu wako.