Wimbo wa Kusifia Imani kwa Mungu Pekee

¹Nafsi yangu yamngoja Mungu peke yake kwa kimya,

Wokovu wangu hutoka kwake.

²Yeye tu ndiye mwamba wangu na wokovu wangu,

Ngome yangu, sitatikisika sana.

³Hata lini mtamshambulia mtu,[#Isa 30:13]

Mpate kumwua ninyi nyote pamoja?

Kama ukuta unaoinama,

Kama kitalu kilicho tayari kuanguka,

⁴Hufanya shauri kumwangusha tu katika cheo chake;[#Zab 28:3]

Huufurahia uongo.

Kwa kinywa chao hubariki;

Kwa moyo wao hulaani.

⁵Nafsi yangu, umngoje Mungu peke yake kwa kimya.[#Mik 7:7,10]

Tumaini langu hutoka kwake.

⁶Yeye tu ndiye mwamba wangu na wokovu wangu,

Ngome yangu, sitatikisika sana.

⁷Kwa Mungu wokovu wangu,[#Yer 3:23]

Na utukufu wangu;

Mwamba wa nguvu zangu,

Na kimbilio langu ni kwa Mungu.

⁸Enyi watu, mtumainini sikuzote,[#1 Sam 1:15; Zab 42:4]

Ifunueni mioyo yenu mbele zake;

Mungu ndiye kimbilio letu.

⁹Hakika binadamu ni ubatili,

Na wenye cheo ni uongo,

Katika mizani huinuka;

Wote pamoja ni hafifu kuliko ubatili.

¹⁰Msiitumainie dhuluma,[#Isa 26:4; Mk 10:23; Lk 12:15]

Wala msijivune kwa unyang’anyi;

Mali izidipo msiiangalie sana moyoni.

¹¹Mara moja amenena Mungu;

Mara mbili nimeyasikia haya,

Ya kuwa nguvu zina Mungu,

¹²Na fadhili ziko kwako, Ee Bwana;[#Ayu 34:11; Yer 17:10; Mt 16:27; 1 Pet 1:17; Rum 2:6; Ufu 2:23]

Maana ndiwe umlipaye kila mtu

Sawasawa na haki yake.