Sala ya Ulinzi kutoka kwa Adui

¹Mungu, uisikie sauti yangu katika malalamiko yangu;

Unilinde uhai wangu na hofu ya adui.

²Utanificha mbali na shauri la siri la watenda mabaya,[#Zab 143:9]

Mbali na ghasia ya watu wafanyao maovu;

³Waliounoa ulimi wao kama upanga,[#Zab 57:4]

Wameielekeza mishale yao, maneno ya uchungu,

⁴Wapate kumpiga mkamilifu faraghani,

Kwa ghafula humpiga wala hawaogopi.

⁵Walijifanya hodari katika jambo baya;

Hushauriana juu ya kutega mitego;

Husema, Ni nani atakayeiona?

⁶Hutunga maovu; husema, Tumefanya shauri kamili;

Na mawazo ya ndani ya kila mmoja wao,

Na moyo wake, huwa siri kabisa.

⁷Kwa hiyo Mungu atawapiga shabaha,

Kwa mshale mara watapigwa.

⁸Ndivyo watakavyokwazwa,[#Mit 12:13]

Ulimi wao wenyewe ukishindana nao.

Wote wawaonao watatikisa kichwa.

⁹Na watu wote wataogopa,

Wataitangaza kazi ya Mungu,

Na kuyafahamu matendo yake.

¹⁰Mwenye haki atamfurahia BWANA na kumkimbilia,[#Zab 32:11; Flp 4:4]

Na wote wenye moyo wa adili watajisifu.