Shukrani kwa Mavuno Mengi

¹Ee Mungu, sifa zakulaiki katika Sayuni,

Na kwako Wewe itaondolewa nadhiri.

²Wewe usikiaye kuomba,[#Lk 11:9,10; Isa 66:23]

Wote wenye mwili watakujia.

³Ingawa maovu mengi yanamshinda,[#Ebr 9:14]

Wewe utayafunika maasi yetu.

⁴Heri mtu yule umchaguaye,[#Zab 33:12]

Na kumkaribisha akae nyuani mwako.

Na tushibe wema wa nyumba yako,

Patakatifu pa hekalu lako.

⁵Kwa mambo ya kutisha utatujibu,

Katika haki, Ee Mungu wa wokovu wetu.

Wewe uliye tumaini la miisho yote ya dunia,

Na la bahari iliyo mbali sana,

⁶Milima waiweka imara kwa nguvu zako,

Huku ukijifunga uweza kama mshipi.

⁷Wautuliza uvumi wa bahari,[#Mt 8:26]

Uvumi wa mawimbi yake,

Na ghasia ya mataifa;

⁸Kwa hiyo wakaao mbali kabisa huogopa ishara zako;[#Ayu 37:5]

Milango ya asubuhi na jioni waifurahisha.

⁹Umeijilia nchi na kuisitawisha,

Umeitajirisha sana;

Mto wa Mungu umejaa maji;

Wawaruzuku watu nafaka

Maana ndiwe uitengenezaye ardhi.

¹⁰Matuta yake wayajaza maji;

Wapasawazisha palipoinuka,

Wailainisha nchi kwa manyunyu;

Waibariki mimea yake.

¹¹Umeuvika mwaka taji ya wema wako;[#Zab 104:3]

Mapito yako yadondoza unono.

¹²Huyadondokea malisho ya nyikani,

Na vilima vyajifunga furaha.

¹³Na malisho yamevikwa kondoo,

Na mabonde yamepambwa nafaka,

Yanashangilia, naam, yanaimba.