KITABU CHA NNE

Mungu Adumuye Milele na Binadamu Apitaye

¹Wewe, Bwana, umekuwa makao yetu,

Kizazi baada ya kizazi.

²Kabla haijazaliwa milima, wala hujaiumba dunia,[#Ayu 38:4-6; Mit 8:25]

Na tangu milele hata milele ndiwe Mungu.

³Wamrudisha mtu mavumbini,[#Mwa 3:19; Mhu 12:7]

usemapo, Rudini, enyi wanadamu.

⁴Maana miaka elfu machoni pako[#Ebr 13:8; 2 Pet 3:8]

Ni kama siku ya jana ikiisha kupita,

Na kama kesha la usiku.

⁵Wawagharikisha, huwa kama usingizi,[#Isa 40:6]

Asubuhi huwa kama majani yameayo.

⁶Asubuhi yachipuka na kumea,[#Ayu 14:2; Zab 92:7]

Jioni yakatika na kukauka.

⁷Maana tumetoweshwa kwa hasira yako,

Na kwa ghadhabu yako tumefadhaishwa.

⁸Umeyaweka maovu yetu mbele zako,[#Zab 50:21; Yer 16:17; Zab 19:12; Mit 5:21; Mhu 12:14; Rum 2:16; 1 Kor 4:5; Ebr 4:12,13]

Siri zetu katika mwanga wa uso wako.

⁹Maana siku zetu zote zimepita katika hasira yako,

Tumetowesha miaka yetu kama kite.

¹⁰Siku za miaka yetu ni miaka sabini,

Na ikiwa tuna nguvu miaka themanini;

Na kiburi chake ni taabu na ubatili,

Maana chapita upesi tukatokomea mara.

¹¹Ni nani aujuaye uweza wa hasira yako?

Na ghadhabu yako kama ipasavyo kicho chako?

¹²Basi, utujulishe kuzihesabu siku zetu,[#Zab 39:4]

Tujipatie moyo wa hekima.

¹³Ee BWANA urudi, hata lini?[#Kum 32:36]

Uwahurumie watumishi wako.

¹⁴Utushibishe asubuhi kwa fadhili zako,

Nasi tutashangilia na kufurahi siku zetu zote.

¹⁵Utufurahishe kwa kadiri ya siku ulizotutesa,

Kama miaka ile tuliyoona mabaya.

¹⁶Matendo yako na yaonekane kwa watumishi wako,[#Zab 44:1; Hab 3:2]

Na adhama yako kwa watoto wao.

¹⁷Na uzuri wa BWANA, Mungu wetu, uwe juu yetu,[#Isa 26:12; 2 The 2:16,17]

Na kazi ya mikono yetu utufanyie thabiti,

Naam, kazi ya mikono yetu uithibitishe.