Mungu Amlipiziaye Mwenye Haki

¹Ee BWANA, Mungu wa kisasi,

Mungu wa kisasi, uangaze,

²Mwenye kuihukumu nchi, ujitukuze,[#Mwa 18:25]

Uwape wenye kiburi stahili zao.

³BWANA, hata lini wasio haki,[#Ayu 20:5]

Hata lini wasio haki watashangilia?

⁴Je! Wote watendao uovu watatoa maneno,[#Yud 1:15]

Na kusema majivuno, na kufanya kiburi?

⁵Ee BWANA, wanawaseta watu wako;

Wanautesa urithi wako;

⁶Wanamwua mjane na mgeni;

Wanawafisha yatima.

⁷Nao husema, BWANA haoni;

Mungu wa Yakobo hafikiri.

⁸Enyi wajinga miongoni mwa watu, fikirini;

Enyi wapumbavu, lini mtakapopata akili?

⁹Aliyelitia sikio mahali pake asisikie?[#Kut 4:11; Mit 20:12]

Aliyelifanya jicho asione?

¹⁰Awaadibuye mataifa asikemee?[#Ayu 35:11; Yn 6:45; Isa 2:3; 28:26]

Amfundishaye mwanadamu asijue?

¹¹BWANA anajua mawazo ya mwanadamu,[#1 Kor 1:21; 1 Kor 3:20]

Ya kuwa ni ubatili.

¹²Ee BWANA, heri mtu yule umwadibuye,[#Ayu 5:17; Mit 3:11; 1 Kor 11:32]

Na kumfundisha kwa sheria yako;

¹³Upate kumstarehesha siku za mabaya,

Hata asiye haki atakapochimbiwa shimo.

¹⁴Kwa kuwa BWANA hatawatupa watu wake,[#Kum 31:6; 1 Sam 12:22; 1 Fal 6:13; Yer 31:37]

Wala hutauacha urithi wake,

¹⁵Maana hukumu itairejea haki,

Na wote walio wanyofu wa moyo wataifuata.

¹⁶Ni nani atakayesimama

Kwa ajili yangu juu ya wabaya?

Ni nani atakayenisaidia

Juu yao wafanyao maovu?

¹⁷Kama BWANA asingalikuwa msaada wangu,

Nafsi yangu kwa upesi ingalikaa penye kimya.

¹⁸Niliposema, Mguu wangu unateleza;

Ee BWANA, fadhili zako zilinitegemeza.

¹⁹Katika wingi wa mawazo ya moyoni mwangu,

Faraja zako zaifurahisha roho yangu.

²⁰Je! Kiti cha udhalimu kishirikiane nawe,[#Amo 6:3; 2 Kor 6:14; Zab 58:2; Isa 10:1]

Kitungacho madhara kwa njia ya sheria?

²¹Huishambulia nafsi yake mwenye haki,[#Mt 27:1; Kut 23:7; Mit 17:15]

Na kuihukumu damu isiyo na hatia.

²²Lakini BWANA amekuwa ngome kwangu,

Na Mungu wangu mwamba wangu wa kukimbilia.

²³Naye atawarudishia uovu wao,[#Mit 2:22]

Atawaangamiza katika ubaya wao,

Naam, BWANA, Mungu wetu, atawaangamiza.