Sifa kwa Mwamuzi wa Dunia

¹Mwimbieni BWANA wimbo mpya,[#Isa 59:16]

Kwa maana ametenda mambo ya ajabu.

Mkono wa kuume wake mwenyewe,

Mkono wake mtakatifu umemtendea wokovu.

²BWANA ameufunua wokovu wake,[#Isa 52:10; Lk 2:30; Isa 62:2; Rum 3:25; Kum 4:31; Mik 7:20; Lk 1:54; Isa 49:6; Lk 3:6; Mdo 13:47]

Machoni pa mataifa ameidhihirisha haki yake.

³Amezikumbuka rehema zake,

Na uaminifu wake kwa nyumba ya Israeli.

Miisho yote ya dunia imeuona

Wokovu wa Mungu wetu.

⁴Mshangilieni BWANA, nchi yote,

Inueni sauti, imbeni kwa furaha, imbeni zaburi.

⁵Mwimbieni BWANA zaburi kwa kinubi,

Kwa kinubi na sauti ya zaburi.

⁶Kwa panda na sauti ya baragumu.[#Hes 10:10; 1 Nya 15:28; 2 Nya 29:27]

Shangilieni mbele za Mfalme, BWANA.

⁷Bahari na ivume na vyote viijazavyo,

Ulimwengu nao wanaokaa ndani yake.

⁸Mito na ipige makofi,

Milima na iimbe pamoja kwa furaha.

⁹Mbele za BWANA;

Kwa maana anakuja aihukumu nchi.

Atauhukumu ulimwengu kwa haki,

Na mataifa kwa adili.