Ghadhabu ya Mungu

¹Nikasikia sauti kuu kutoka hekaluni, ikiwaambia wale malaika saba, Enendeni, mkavimimine vile vitasa saba vya ghadhabu ya Mungu juu ya nchi.[#Isa 66:6; Zab 69:24; Yer 10:25; Sef 3:8]

²Akaenda huyo wa kwanza, akakimimina kitasa chake juu ya nchi; pakawa na jipu baya, bovu, juu ya wale watu wenye chapa ya huyo mnyama, na wale wenye kuisujudia sanamu yake.[#Kut 9:10,11; Kum 28:35]

³Na huyo wa pili akakimimina kitasa chake juu ya bahari, ikawa damu kama damu ya mfu, na vitu vyote vyenye roho ya uhai katika bahari vikafa.[#Kut 7:17-21]

⁴Na huyo wa tatu akakimimina kitasa chake juu ya mito na chemchemi za maji; zikawa damu.[#Kut 7:17-21; Zab 78:44]

⁵Nami nikamsikia malaika wa maji akisema, Wewe u mwenye haki, uliyeko na uliyekuwako, Mtakatifu, kwa kuwa umehukumu hivi;[#Zab 119:137; 145:17; Kut 3:14; Kum 32:4; Isa 41:4]

⁶kwa kuwa walimwaga damu ya watakatifu na ya manabii, nawe umewapa damu wainywe; nao wamestahili.[#Isa 49:26; Zab 79:3]

⁷Nikaisikia hiyo madhabahu ikisema, Naam, Bwana Mungu Mwenyezi, ni za kweli, na za haki, hukumu zako.[#Zab 19:9; 119:137; Ufu 9:13; 19:2]

⁸Na huyo wa nne akakimimina kitasa chake juu ya jua, nalo likapewa kuwaunguza wanadamu kwa moto.

⁹Wanadamu wakaunguzwa maunguzo makubwa, nao wakalitukana jina la Mungu aliye na mamlaka juu ya mapigo hayo; wala hawakutubu wala kumpa utukufu.[#Ufu 16:21; 9:20,21]

¹⁰Na huyo wa tano akakimimina kitasa chake juu ya kiti cha enzi cha yule mnyama; ufalme wake ukatiwa giza; wakatafuna ndimi zao kwa sababu ya maumivu,[#Kut 10:21; Isa 8:21,22]

¹¹wakamtukana Mungu wa mbingu kwa sababu ya maumivu yao, na kwa sababu ya majipu yao; wala hawakuyatubia matendo yao.[#Dan 2:19]

¹²Na huyo wa sita akakimimina kitasa chake juu ya mto ule mkubwa Frati; maji yake yakakauka, ili njia itengenezwe kwa wafalme watokao katika maawio ya jua.[#Isa 11:15; 41:2; 44:27; Mwa 15:18; Kum 1:7; Yos 1:4; Yer 50:38]

¹³Nikaona roho tatu za uchafu zilizofanana na vyura, zikitoka katika kinywa cha yule joka, na katika kinywa cha yule mnyama, na katika kinywa cha yule nabii wa uongo.[#Ufu 12:9; 13:1,11; Kut 8:3; 1 Fal 22:21-23]

¹⁴Hizo ndizo roho za mashetani, zifanyazo ishara, zitokazo na kuwaendea wafalme wa ulimwengu wote kuwakusanya kwa vita ya siku ile kuu ya Mungu Mwenyezi.[#Ufu 13:13; 19:19]

¹⁵(Tazama, naja kama mwivi. Heri akeshaye, na kuyatunza mavazi yake, asiende uchi hata watu wakaione aibu yake.)[#Mt 24:43-44; Lk 12:39-40; Ufu 3:3,18; 1 The 5:2]

¹⁶Wakawakusanya hata mahali paitwapo kwa Kiebrania, Har-Magedoni.[#2 Fal 9:27; 23:29; Zek 12:11; Amu 5:19,31]

¹⁷Na huyo wa saba akakimimina kitasa chake juu ya anga. Sauti kuu ikatoka katika hekalu, katika kile kiti cha enzi, ikisema, Imekwisha kuwa.[#Isa 66:6]

¹⁸Pakawa na umeme na sauti na radi; na palikuwa na tetemeko la nchi kubwa, ambalo tangu wanadamu kuwako juu ya nchi hapakuwa namna ile, jinsi lilivyokuwa kubwa tetemeko hilo.[#Ufu 4:5; 8:5; 11:13,19; Kut 19:16; Dan 12:1]

¹⁹Na mji ule mkuu ukagawanyikana mafungu matatu, na miji ya mataifa ikaanguka; na Babeli ule mkuu ukakumbukwa mbele za Mungu, kupewa kikombe cha mvinyo ya ghadhabu ya hasira yake.[#Isa 51:17; Dan 4:30; Yer 25:15; Ufu 14:10]

²⁰Kila kisiwa kikakimbia, wala milima haikuonekana tena.[#Ufu 6:14; 20:11]

²¹Na mvua ya mawe kubwa sana, ya mawe mazito kama talanta, ikashuka kutoka mbinguni juu ya wanadamu. Wanadamu wakamtukana Mungu kwa sababu ya lile pigo la mvua ya mawe; kwa maana pigo lake ni kubwa mno.[#Kut 9:23; Ufu 11:19]