Mto wa Maji ya Uzima

¹Kisha akanionyesha mto wa maji ya uzima, wenye kung’aa kama bilauri, ukitoka katika kiti cha enzi cha Mungu, na cha Mwana-Kondoo,[#Eze 47:1; Zek 14:8]

²katikati ya njia kuu yake. Na upande huu na upande huu wa ule mto, ulikuwapo mti wa uzima, uzaao matunda, aina kumi na mbili, wenye kutoa matunda yake kila mwezi; na majani ya mti huo ni ya kuwaponya mataifa.[#Mwa 2:9; Eze 47:12; Ufu 21:21]

³Wala hapatakuwa na laana yo yote tena. Na kiti cha enzi cha Mungu na cha Mwana-Kondoo kitakuwamo ndani yake. Na watumwa wake watamtumikia;[#Zek 14:11]

⁴nao watamwona uso wake, na jina lake litakuwa katika vipaji vya nyuso zao.[#Mt 5:8; Ufu 3:12]

⁵Wala hapatakuwa na usiku tena; wala hawana haja ya taa wala ya nuru ya jua; kwa kuwa Bwana Mungu huwatia nuru, nao watatawala hata milele na milele.[#Isa 60:19; Dan 7:18,27; Ufu 21:25]

⁶Kisha akaniambia, Maneno haya ni amini na kweli. Naye Bwana, Mungu wa roho za manabii, alimtuma malaika wake kuwaonyesha watumwa wake mambo ambayo hayana budi kuwako upesi.[#Ufu 1:1; 1 Kor 14:32]

⁷Na tazama, naja upesi; heri yeye ayashikaye maneno ya unabii wa kitabu hiki.[#Ufu 3:11; 1:3]

Hitimisho na Baraka

⁸Nami Yohana ndimi niliyeyasikia na kuyaona mambo hayo. Na hapo nilipoyasikia na kuyaona nalianguka, ili nisujudu mbele ya miguu ya malaika yule mwenye kunionyesha hayo.[#Ufu 19:10]

⁹Naye akaniambia, Angalia, usifanye hivi; mimi ni mjoli wako, na wa ndugu zako manabii, na wa wale wayashikao maneno ya kitabu hiki. Msujudie Mungu.

¹⁰Akaniambia, Usiyatie muhuri maneno ya unabii wa kitabu hiki, kwa maana wakati huo umekaribia.[#Ufu 10:4; 1:3; Dan 8:26; 12:4]

¹¹Mwenye kudhulumu na azidi kudhulumu; na mwenye uchafu na azidi kuwa mchafu; na mwenye haki na azidi kufanya haki; na mtakatifu na azidi kutakaswa.[#Dan 12:10]

¹²Tazama, naja upesi, na ujira wangu u pamoja nami, kumlipa kila mtu kama kazi yake ilivyo.[#Isa 40:10; 62:11; Zab 28:4; 62:12; Yer 17:10; Ufu 3:11; Rum 2:6]

¹³Mimi ni Alfa na Omega, mwanzo na mwisho, wa kwanza na wa mwisho.[#Ufu 1:8,17; 2:8; Isa 44:6; 48:12; Ebr 13:8]

¹⁴Heri wazifuao nguo zao, wawe na amri kuuendea huo mti wa uzima, na kuingia mjini kwa milango yake.[#Mwa 2:9; 3:22; 49:11]

¹⁵Huko nje wako mbwa, na wachawi, na wazinzi, na wauaji, na hao waabuduo sanamu, na kila mtu apendaye uongo na kuufanya.[#Ufu 21:8,27; 1 Kor 6:9,10]

¹⁶Mimi Yesu nimemtuma malaika wangu kuwashuhudia ninyi mambo hayo katika makanisa. Mimi ndimi niliye Shina na Mzao wa Daudi, ile nyota yenye kung’aa ya asubuhi.[#Isa 11:1,2,10; 5:5; Isa 11:1,10; Lk 1:78; Ufu 1:1,2; 5:5]

¹⁷Na Roho na Bibi-arusi wasema, Njoo! Naye asikiaye na aseme, Njoo! Naye mwenye kiu na aje; na yeye atakaye, na ayatwae maji ya uzima bure.[#Isa 55:1; Ufu 21:6; Zek 14:8; Rum 8:23; Yn 7:37]

¹⁸Namshuhudia kila mtu ayasikiaye maneno ya unabii wa kitabu hiki, Mtu ye yote akiyaongeza, Mungu atamwongezea hayo mapigo yaliyoandikwa katika kitabu hiki.[#Kum 4:2; 12:32; 29:20; Ufu 15:1,6]

¹⁹Na mtu ye yote akiondoa lo lote katika maneno ya unabii wa kitabu hiki, Mungu atamwondolea sehemu yake katika ule mti wa uzima, na katika ule mji mtakatifu, ambao habari zake zimeandikwa katika kitabu hiki.[#Mwa 2:9; 3:22]

²⁰Yeye mwenye kuyashuhudia haya asema, Naam; naja upesi. Amina; na uje, Bwana Yesu.

²¹Neema ya Bwana Yesu na iwe pamoja nanyi nyote. Amina.