Uzuri wa Bibi Arusi Watukuzwa

¹Tazama, u mzuri, mpenzi wangu,[#Wim 1:15; 6:5]

U mzuri, macho yako ni kama ya hua,

Nyuma ya barakoa yako.

Nywele zako ni kama kundi la mbuzi,

Wakijilaza mbavuni pa mlima Gileadi.

²Meno yako ni kama kundi waliokatwa manyoya,[#Wim 6:6]

Wakipanda kutoka kuoshwa,

Ambao kila mmoja amezaa mapacha,

Wala hakuna aliyefiwa kati yao.

³Midomo yako ni kama uzi mwekundu,

Na kinywa chako ni kizuri;

Mashavu yako ni kama kipande cha komamanga,

Nyuma ya barakoa yako.

⁴Shingo yako ni kama mnara wa Daudi,[#2 Sam 22:51; Wim 1:10; Neh 3:19]

Uliojengwa pa kuwekea silaha;

Ngao elfu zimetungikwa juu yake,

Zote ni ngao za mashujaa.

⁵Maziwa yako mawili ni kama wana-paa wawili,[#Mit 5:19; Wim 1:13; Isa 66:10-12; 1 Pet 2:2]

Nyuma ya barakoa yako.

Ambao ni mapacha ya paa;

Wakilisha penye nyinyoro.

⁶Hata jua lipunge, na vivuli vikimbie,

Nitakwenda kwenye mlima wa manemane,

Na kwenye kilima cha ubani.

⁷Mpenzi wangu, u mzuri pia pia,[#Efe 5:27]

Wala ndani yako hamna ila.

⁸Bibi arusi, njoo pamoja nami toka Lebanoni,[#Kum 3:9]

Pamoja nami toka Lebanoni.

Shuka kutoka kilele cha Amana,

Kutoka vilele vya Seniri na Hermoni;

Kutoka mapangoni mwa simba,

Kutoka milimani mwa chui.

⁹Umenishangaza moyo, umbu langu,[#Isa 54:5; Yn 3:29; 2 Kor 11:2; Ufu 19:7,8]

Bibi arusi, umenishangaza moyo,

Kwa mtupo mmoja wa macho yako,

Kwa mkufu mmoja wa shingo yako.

¹⁰Jinsi zilivyo nzuri pambaja zako, umbu langu,

Bibi arusi, ni nzuri kupita divai;

Na harufu ya marhamu yako

Yapita manukato ya kila namna.

¹¹Bibi arusi, midomo yako yadondoza asali,[#Mit 24:13,14; Mwa 27:27; Hos 14:6,7]

Asali na maziwa vi chini ya ulimi wako;

Na harufu ya mavazi yako

Ni kama harufu ya Lebanoni.

¹²Bustani iliyofungwa ni umbu langu, bibi arusi,[#Isa 58:11; Hos 3:3]

Kijito kilichofungwa, chemchemi iliyotiwa muhuri.

¹³Machipuko yako ni bustani ya komamanga,

Yenye matunda mazuri, hina na nardo,

¹⁴Nardo na zafarani, mchai na mdalasini,

Na miti yote iletayo ubani,

Manemane na udi, na kolezi kuu zote.

¹⁵Wewe ndiwe chemchemi ya bustani yangu,[#Yn 4:10]

Kisima cha maji yaliyo hai,

Vijito vya Lebanoni viendavyo kasi.

¹⁶Amka, kaskazi; nawe uje, kusi;[#Gal 5:22; Wim 5:1]

Vumeni juu ya bustani yangu,

Manukato ya bustani yatokee.

Mpendwa wangu na aingie bustanini mwake,

Akayale matunda yake mazuri.