Uovu wa Yerusalemu

¹Ole wake yeye aliyeasi na kutiwa unajisi, mji wa udhalimu!

²Hakuitii sauti; hakukubali kurudiwa; hakumwamini BWANA; hakumkaribia Mungu wake.[#Yer 22:21; 5:3]

³Wakuu wake walio ndani yake ni simba wangurumao; makadhi wake ni mbwa-mwitu wa jioni; hawasazi kitu cho chote hata siku ya pili.

⁴Manabii wake ni watu hafifu, wadanganyifu; makuhani wake wamepatia unajisi patakatifu, wameifanyia sheria udhalimu.[#Yer 23:11; Eze 22:26]

⁵BWANA kati yake ni mwenye haki; hatatenda uovu; kila asubuhi hudhihirisha hukumu yake, wala hakomi; bali mtu asiye haki hajui kuona haya.[#Kum 32:4; Zab 99:3,4]

⁶Nimekatilia mbali mataifa, buruji zao zina ukiwa; nimeziharibu njia kuu zao, hata hapana mmoja apitaye; miji yao imeangamizwa; hamna mtu hata mmoja, wala hapana akaaye huko.

⁷Nalisema, Hakika utaniogopa, utakubali kurudiwa; ili yasikatiliwe mbali makao yake, sawasawa ya yote niliyoagiza katika habari zake; lakini waliondoka mapema na kuyaharibu matendo yao yote.[#Mwa 6:12]

Adhabu na Wokovu wa Mataifa

⁸Basi ningojeni, asema BWANA, hata siku ile nitakapoondoka kuteka mateka; maana nimeazimia kuwakusanya mataifa, ili nizikutanishe falme, nipate kuwamwagia ghadhabu yangu; naam, ukali wote wa hasira yangu; kwa maana dunia yote itateketezwa kwa moto wa wivu wangu.[#Mit 20:22; Yoe 3:2]

⁹Maana hapo ndipo nitakapowarudishia mataifa lugha iliyo safi, wapate kuliitia jina la BWANA, wamtumikie kwa nia moja.

¹⁰Maana toka nchi iliyo mbali na mito ya Kushi, waniombao dua, yaani, binti za watu wangu waliotawanyika, wataleta matoleo yangu.[#Zab 68:31; Mal 1:11; Mdo 8:27]

¹¹Siku ile hutatahayarikia matendo yako yote uliyoniasi; maana hapo nitawaondoa watu wako wanaotakabari na kujivuna, wasiwe kati yako, wala hutatakabari tena katika mlima wangu mtakatifu.[#Mt 3:9]

¹²Lakini nitasaza ndani yako watu walioonewa na maskini, nao watalitumainia jina la BWANA.[#Isa 14:32; 57:15; Mt 5:3; Lk 6:20]

¹³Mabaki ya Israeli hawatatenda uovu, wala kusema uongo; wala ulimi wa hadaa hautaonekana kinywani mwao; kwa maana watakula na kulala, wala hapana mtu atakayewaogofya.[#Ufu 14:5]

Wimbo wa Shangwe

¹⁴Imba, Ee binti Sayuni; piga kelele, Ee Israeli;[#Zab 14:7]

Furahi na kushangilia kwa moyo wako wote, Ee binti Yerusalemu.

¹⁵BWANA ameziondoa hukumu zako,[#Yn 1:49; Eze 48:35; Ufu 21:3]

Amemtupa nje adui yako;

Mfalme wa Israeli, naam, yeye BWANA, yu katikati yako;

Hutaogopa uovu tena.

¹⁶Katika siku ile Yerusalemu utaambiwa,[#Isa 35:3]

Usiogope, Ee Sayuni; mikono yako isilegee.

¹⁷BWANA, Mungu wako, yu katikati yako shujaa awezaye kuokoa;

Atakushangilia kwa furaha kuu,

Atakutuliza katika upendo wake,

Atakufurahia kwa kuimba.

¹⁸Nitawakusanya wanaousikitikia mkutano wa ibada, hao waliokuwa wa kwako; ambao mzigo uliokuwa juu yake ulikuwa fedheha kwao.[#Omb 2:6]

¹⁹Tazama, wakati huo nitawapatiliza watu wote wanaokutesa; nami nitamponya yeye achechemeaye, nami nitamkusanya yeye aliyefukuzwa; nami nitawafanya kuwa sifa na jina, hao ambao fedheha yao ilikuwa katika dunia yote.

²⁰Wakati huo nitawaingizeni, na wakati huo nitawakusanya; kwa maana nitawafanya ninyi kuwa sifa na jina, miongoni mwa watu wote wa dunia, nitakapowarudisha wafungwa wenu mbele ya macho yenu, asema BWANA.[#Zab 22:27]