Uwe tayari kwa ujio wa Bwana

¹Na sasa ndugu zangu, hatuna haja ya kuwaandikia juu ya nyakati na tarehe.

²Ninyi mnafahamu vizuri kuwa siku ambayo Bwana atakuja itakuwa ya kushitukiza, kama mwizi anavyokuja usiku.

³Watu watasema, “tuna amani na tuko salama.” Wakati huo ndipo uharibifu utakapowajia haraka, kama maumivu anayoyapata mwanamke anapojifungua. Na watu hao hawataweza kukwepa.

⁴Lakini ninyi ndugu zangu, hamuishi katika giza. Na hivyo ile siku haitawashangaza kama mwivi.

⁵Nyote ni watu wa nuru. Ni watu wa mchana. Hatuko katika usiku wala giza.

⁶Hivyo tusiwe kama watu wengine. Tusiwe wasinziao. Tuwe macho na wenye kiasi.

⁷Watu walalao, hulala usiku. Watu wanywao kupita kiasi, hunywa usiku.

⁸Bali sisi ni watu wa mchana, hivyo tujitawale wenyewe. Tuvae imani na upendo vitulinde. Na tumaini la wokovu liwe kwetu kama kofia ya vita.

⁹Mungu hakutuchagua tuangamie katika hasira yake. Mungu alituchagua tuwe na wokovu katika Bwana wetu Yesu Kristo.

¹⁰Yesu alikufa kwa ajili yetu ili tuishi pamoja nae. Haijalishi kama tu hai au wafu atakapokuja.

¹¹Hivyo farijianeni ninyi kwa ninyi na msaidiane kukua imara katika imani, kama mnavyofanya sasa.

Maagizo ya Mwisho na Salamu

¹²Tunawaomba mwatambue wale wanaofanya kazi kwa bidii miongoni mwenu, wale ambao, kama wafuasi wa Bwana, wanatumika kama viongozi wenu na kuwafundisha namna ya kuishi.

¹³Wapeni heshima ya hali ya juu na upendo kwa sababu ya kazi wanayofanya.

Ishini kwa amani kila mmoja na mwenzake.

¹⁴Tunawasihi, kuwaonya wale wanaokataa kuishi kwa kuwajibika. Watieni moyo wanaoogopa. Wasaidieni walio dhaifu. Mvumilieni kila mmoja.[#5:14 Ikiwa na maana ya “kuishi kwa kufuata utaratibu unaofaa” Kuishi pasipo kuwajibika ni kutofanya kazi.]

¹⁵Asiwepo anae jaribu kulipiza baya kwa baya. Lakini kila mara mfanye lililo jema kwa kila mmoja wenu na kwa watu wote.

¹⁶Muwe na furaha daima.

¹⁷Msiache kuomba.

¹⁸Shukuruni kwa kila jambo. Hivi ndivyo Mungu anavyotutaka tuishi katika Kristo Yesu.

¹⁹Msiizimishe kazi ya Roho Mtakatifu.

²⁰Msiuchukulie unabii kama kitu kisicho cha muhimu.

²¹Lakini pimeni kila kitu. Lishikeni lililo jema,

²²na mkae mbali na kila aina ya ovu.

²³Tunaomba kwamba Mungu mwenyewe, Mungu wa amani, atawafanya muwe watakatifu mkiwa wake. Tunaomba kwamba katika roho yote, nafsi yote, na mwili mzima mtahifadhiwa salama pasipo lawama Bwana wetu Yesu Kristo atakapokuja.

²⁴Yeye awaitae atawatendea haya. Mnaweza kumtumainia.

²⁵Kaka na dada zangu, tafadhali mtuombee.

²⁶Wasalimuni ndugu wote kwa salamu maalum ya watu wa Mungu.[#5:26 Kwa maana ya kawaida, “busu takatifu”.]

²⁷Ninawaagiza kwa mamlaka ya Bwana kuusoma walaka huu kwa waamini wote huko.

²⁸Neema ya Bwana wetu Yesu kristo iwe nanyi nyote.