JOB 25

Ang ikatlong pagsasalita ni Bildad. Ang tao ay malaking kababaan sa Dios.

¹Nang magkagayo'y sumagot si Bildad na Suhita, at nagsabi,

²Kapangyarihan at takot ay sumasa kaniya;

Siya'y gumagawa ng kapayapaan sa kaniyang mga mataas na dako.

³May anomang bilang ba sa kaniyang mga hukbo?[#Is. 40:26.]

At doon sa hindi sinisikatan ng kaniyang liwanag?

⁴Paano ngang makapagiging ganap ang tao sa Dios?[#Job 4:17-19.]

O paanong magiging malinis siya na ipinanganak ng isang babae.

⁵Narito, pati ng buwan ay walang liwanag,

At ang mga bituin ay hindi dalisay sa kaniyang paningin:

⁶Gaano pa nga kaliit ang tao, na isang uod!

At ang anak ng tao, na isang uod!