MGA KAWIKAAN 11

Iba't ibang kawikaan. Pinagpaparis ang matuwid at ang masama.

¹Ang marayang timbangan ay kasuklamsuklam sa Panginoon:[#Lev. 19:35, 36; Deut. 25:13, 15; Kaw. 16:11; 20:10, 23.]

Nguni't ang ganap na timbangan ay kaniyang kaluguran.

²Pagka dumarating ang kapalaluan ay dumarating nga ang kahihiyan:

Nguni't nasa mababa ang karunungan.

³Ang pagtatapat ng mga matuwid ay papatnubay sa kanila:

Nguni't ang mga kasuwailan ng mga taksil ay papatay sa kanila.

⁴Ang mga kayamanan ay walang kabuluhan sa kaarawan ng poot:[#Ezek. 7:19; Zef. 1:18.]

Nguni't ang katuwiran ay nagliligtas sa kamatayan.

⁵Ang katuwiran ng sakdal ay magtuturo ng kaniyang lakad:

Nguni't mabubuwal ang masama dahil sa kaniyang sariling kasamaan.

⁶Ang katuwiran ng mga matuwid ay magliligtas sa kanila:

Nguni't silang gumagawang may karayaan ay madadakip sa kanilang sariling kasamaan.

⁷Pagka ang masamang tao ay namamatay, ang kaniyang pag-asa ay mapapasa pagkapahamak;

At ang pagasa ng masama ay nawawala.

⁸Ang matuwid ay naliligtas sa kabagabagan,[#Kaw. 21:18.]

At ang masama ay dumarating na kahalili niya.

⁹Pinapatay ng masama ng kaniyang bibig ang kaniyang kapuwa:

Nguni't sa kaalaman ay maliligtas ang matuwid.

¹⁰Pagka napapabuti ang mga matuwid ang bayan ay nagagalak:[#Kaw. 28:12, 28.]

At pagka ang masama ay namamatay, may hiyawan.

¹¹Nabubunyi ang bayan sa pamamagitan ng pagpapala ng matuwid:[#Kaw. 29:8.]

Nguni't napapahamak sa pamamagitan ng bibig ng masama.

¹²Siyang humahamak sa kaniyang kapuwa ay walang karunungan:

Nguni't ang taong naguunawa ay tumatahimik.

¹³Siyang yumayaong mapaghatid dumapit ay naghahayag ng mga lihim:[#Kaw. 20:19.]

Nguni't ang may diwang tapat ay nagtatakip ng bagay.

¹⁴Kung saan walang pantas na pamamahala, ang bayan ay nababagsak:[#Kaw. 15:22; 24:6.]

Nguni't sa karamihan ng mga tagapayo ay may kagalingan.

¹⁵Siyang nananagot sa di kilala, ay mapapariwara:[#Kaw. 6:1.]

Nguni't siyang nagtatanim sa pananagot ay tiwasay.

¹⁶Ang mapagbiyayang babae ay nagiimpok ng karangalan:

At ang marahas na lalake ay pumipigil ng kayamanan.

¹⁷Ang maawaing tao ay gumagawa ng mabuti sa kaniyang sariling kaluluwa:[#Mat. 5:8.]

Nguni't ang taksil ay bumabagabag sa kaniyang sariling laman.

¹⁸Ang masama ay nakikinabang ng mga marayang sahod:

Nguni't ang naghahasik ng katuwiran ay nagtatamo ng tiwasay na ganting pala.

¹⁹Siyang matatag sa katuwiran ay magtatamo ng buhay:

At siyang humahabol ng kasamaan ay sa kaniyang sariling ikamamatay.

²⁰Silang suwail sa puso ay kasuklamsuklam sa Panginoon:

Nguni't ang gayong sakdal sa kanilang lakad ay kaniyang kaluguran.

²¹Bagaman ang kamay ay makikikamay, ang masamang tao ay walang pagsalang parurusahan:[#Jer. 25:29; 1 Ped. 4:18.]

Nguni't ang binhi ng matuwid ay maliligtas.

²²Kung paano ang hiyas na ginto sa nguso ng baboy,

Gayon ang magandang babae na walang bait.

²³Ang nasa ng matuwid ay buti lamang:

Nguni't ang hintay ng masama ay poot.

²⁴May nagsasabog, at tumutubo pa,[#Awit 112:9.]

At may humahawak naman ng higit kay sa karampatan, nguni't nauuwi lamang sa pangangailangan.

²⁵Ang kaluluwang mapagbigay ay tataba:[#2 Cor. 9:6-10.]

At siyang dumidilig ay madidilig din.

²⁶Siyang humahawak ng trigo ay susumpain siya ng bayan:[#Amos 8:5, 6.]

Nguni't kapurihan ay mapapasaulo niya na nagbibili niyaon.

²⁷Siyang humahanap na masikap ng mabuti ay humahanap ng lingap:

Nguni't siyang kumakatha ng sama ay sa kaniya lalagpak.

²⁸Siyang tumitiwala sa kaniyang mga kayamanan ay mabubuwal:[#Mar. 10:24.]

Nguni't ang matuwid ay mamumukadkad na parang sariwang dahon.

²⁹Siyang bumabagabag ng kaniyang sariling sangbahayan ay magmamana ng hangin:[#Ec. 5:16.]

At ang mangmang ay magiging alipin ng pantas sa puso.

³⁰Ang bunga ng matuwid ay punong kahoy ng buhay;

At siyang pantas ay humihikayat ng mga kaluluwa.

³¹Narito, ang matuwid ay gagantihin sa lupa:[#Jer. 25:29; 1 Ped. 4:18.]

Gaano pa nga kaya ang masama at makasalanan!