MGA AWIT 108

Awit, Salmo ni David.

¹Ang aking puso'y matatag, Oh Dios;[#Hanggang tal. 5; Awit 5:7, 11.]

Ako'y aawit, oo, ako'y aawit ng mga pagpuri, ng aking kaluwalhatian.

²Kayo'y gumising, salterio at alpa:

Ako ma'y gigising na maaga.

³Ako'y magpapasalamat sa iyo, Oh Panginoon, sa gitna ng mga bayan:

At ako'y aawit ng mga pagpuri sa iyo sa gitna ng mga bansa.

⁴Sapagka't ang iyong kagandahang-loob ay dakila sa itaas sa mga langit,[#Awit 113:4; Jer. 51:9.]

At ang iyong katotohanan ay umaabot sa mga alapaap.

⁵Mabunyi ka, Oh Dios, sa itaas sa mga langit:

At ang iyong kaluwalhatian sa ibabaw ng buong lupa.

⁶Upang ang iyong minamahal ay maligtas,[#Hanggang tal. 13; Awit 60:5, 12.]

Magligtas ka ng iyong kanan, at sagutin mo kami.

⁷Nagsalita ang Dios sa kaniyang kabanalan; ako'y magsasaya:

Aking hahatiin ang Sichem, at susukatin ko ang libis ng Sucoth.

⁸Galaad ay akin; Manases ay akin;

Ang Ephraim naman ay sanggalang ng aking ulo:

Juda'y aking cetro.

⁹Moab ay aking hugasan;

Sa Edom ay ihahagis ko ang aking panyapak:

Sa Filistia ay hihiyaw ako.

¹⁰Sinong magpapasok sa akin sa bayang nakukutaan?[#Jos. 19:29.]

Sinong papatnubay sa akin hanggang sa Edom?

¹¹Hindi ba ikaw Oh Dios na nagtakuwil sa amin,

At hindi lumalabas, Oh Dios, na kasama ng aming mga hukbo?

¹²Gawaran mo kami ng tulong laban sa kaaway;

Sapagka't walang kabuluhan ang tulong ng tao.

¹³Sa tulong ng Dios ay gagawa kaming may katapangan:[#Awit 60:2.]

Sapagka't siya ang yayapak sa aming mga kaaway.