MGA AWIT 116

Pagpapasalamat sa pagliligtas mula sa kamatayan.

¹Aking iniibig ang Panginoon, sapagka't kaniyang dininig[#Awit 18:1.; #Awit 66:19; 118:21.]

Ang aking tinig at aking mga hiling.

²Sapagka't kaniyang ikiniling ang kaniyang pakinig sa akin,[#Awit 86:11.]

Kaya't ako'y tatawag sa kaniya habang ako'y nabubuhay.

³Ang tali ng kamatayan ay pumulupot sa akin,[#Awit 18:4.]

At ang mga sakit ng Sheol ay nagsihawak sa akin:

Aking nasumpungan ang kabagabagan at kapanglawan.

⁴Nang magkagayo'y tumawag ako sa pangalan ng Panginoon;[#Awit 18:6.]

Oh Panginoon, isinasamo ko sa iyo, iligtas mo ang aking kaluluwa.

⁵Mapagbiyaya ang Panginoon, at matuwid;[#Awit 86:15; 145:17.]

Oo, ang Dios namin ay maawain.

⁶Pinalalagi ng Panginoon ang mga tapat na loob :

Ako'y nababa, at kaniyang iniligtas ako.

⁷Bumalik ka sa iyong kapahingahan, Oh kaluluwa ko;[#Jer. 6:16; Mat. 11:29.]

Sapagka't ginawan ka ng mabuti ng Panginoon.

⁸Sapagka't iyong iniligtas ang kaluluwa ko sa kamatayan,[#Awit 56:13; 86:13.]

At ang mga mata ko sa mga luha,

At ang mga paa ko sa pagkabuwal.

⁹Ako'y lalakad sa harap ng Panginoon,

Sa lupain ng mga buháy.

¹⁰Ako'y sumasampalataya, sapagka't ako'y magsasalita:[#2 Cor. 6:28.]

Ako'y lubhang nagdalamhati:

¹¹Aking sinabi sa aking pagmamadali,[#Awit 31:22.]

Lahat ng tao ay bulaan.

¹²Ano ang aking ibabayad sa Panginoon

Dahil sa lahat niyang kabutihan sa akin?

¹³Aking kukunin ang saro ng kaligtasan,[#Awit 16:5; Luc. 22:17.]

At tatawag ako sa pangalan ng Panginoon.

¹⁴Aking babayaran ang mga panata ko sa Panginoon,[#Awit 22:25.]

Oo, sa harapan ng buo niyang bayan.

¹⁵Mahalaga sa paningin ng Panginoon[#Blg. 23:10; Awit 72:16.]

Ang kamatayan ng kaniyang mga banal.

¹⁶Oh Panginoon, tunay na ako'y iyong lingkod;

Ako'y iyong lingkod, na anak ng iyong lingkod na babae;

Iyong kinalag ang aking mga tali.

¹⁷Aking ihahandog sa iyo ang hain na pasalamat,[#Awit 107:22.]

At tatawag ako sa pangalan ng Panginoon.

¹⁸Aking babayaran ang mga panata ko sa Panginoon,[#tal. 14.]

Oo, sa harapan ng buo niyang bayan;

¹⁹Sa mga looban ng bahay ng Panginoon,

Sa gitna mo, Oh Jerusalem.

Purihin ninyo ang Panginoon.