MGA AWIT 124

Pagpuri dahil sa pagliligtas laban sa kaaway. Awit sa mga Pagsampa; ni David.

¹Kung hindi ang Panginoon ay naging kakampi natin,[#Awit 94:17.]

Sabihin ng Israel ngayon,

²Kung hindi ang Panginoon ay naging kakampi natin,

Nang ang mga tao ay magsibangon laban sa atin:

³Nilamon nga nila sana tayong buháy,[#Awit 56:1.]

Nang ang kanilang poot ay mangagalab laban sa atin:

⁴Tinabunan nga sana tayo ng tubig,[#Awit 18:16; 144:7.]

Dinaanan nga sana ang ating kaluluwa ng agos:

⁵Dinaanan nga sana ang ating kaluluwa ng mga palalong tubig.

⁶Purihin ang Panginoon,

Na hindi tayo ibinigay na pinaka huli sa kanilang mga ngipin.

⁷Ang kaluluwa natin ay nakatanan na parang ibon sa silo ng mga manghuhuli:[#Awit 91:3.]

Ang silo ay nasira, at tayo ay nakatanan.

⁸Ang saklolo natin ay nasa pangalan ng Panginoon,[#Awit 121:2.]

Na siyang gumawa ng langit at lupa.