MGA AWIT 147

Pagpupuri dahil sa muling pagkakatayo ng Jerusalem at kasaganaan.

¹Purihin ninyo ang Panginoon; Sapagka't mabuting umawit ng mga pagpuri sa ating Dios;[#Awit 92:1.]

Sapagka't maligaya, at ang pagpuri ay nakalulugod.

²Itinatayo ng Panginoon ang Jerusalem;[#Awit 102:16.]

Kaniyang pinipisan ang mga natapon na Israel.

³Kaniyang pinagagaling ang mga may bagbag na puso,[#Awit 51:17.]

At tinatalian niya ang kanilang mga sugat.

⁴Kaniyang sinasaysay ang bilang ng mga bituin;[#Gen. 15:5; Is. 40:26.]

Siya ang nagbibigay sa kanila ng lahat nilang pangalan.

⁵Dakila ang ating Panginoon, at makapangyarihan sa kapangyarihan;

Ang kaniyang unawa ay walang hanggan,

⁶Inaalalayan ng Panginoon ang maamo:[#Awit 146:8, 9.]

Kaniyang inilulugmok sa lupa ang masama.

⁷Magsiawit kayo sa Panginoon ng pagpapasalamat;

Magsiawit kayo sa alpa ng mga pagpuri sa ating Dios:

⁸Na nagtatakip sa mga langit ng mga alapaap.[#Job 38:26, 28; Awit 104:14.]

Na siyang naghahanda ng ulan sa lupa,

na nagpapatubo ng damo sa mga bundok.

⁹Siya'y nagbibigay sa hayop ng kaniyang pagkain.[#Job 39:3; Awit 104:27; Mat. 6:26.]

At sa mga inakay na uwak na nagsisidaing.

¹⁰Siya'y hindi nalulugod sa lakas ng kabayo:[#Awit 33:17; Os. 1:7.]

Siya'y hindi nasasayahan sa mga paa ng tao.

¹¹Ang Panginoon ay naliligaya sa kanila na nangatatakot sa kaniya,

Sa nagsisiasa sa kaniyang kagandahang-loob.

¹²Purihin mo ang Panginoon, Oh Jerusalem;

Purihin mo ang iyong Dios, Oh Sion.

¹³Sapagka't kaniyang pinatibay ang mga halang ng iyong mga pintuang-bayan;

Kaniyang pinagpala ang iyong mga anak sa loob mo.

¹⁴Siya'y gumagawa ng kapayapaan sa iyong mga hangganan;[#Is. 60:17, 18.]

Kaniyang binubusog ka ng pinakamainam na trigo.

¹⁵Kaniyang sinusugo ang kaniyang utos sa lupa;

Ang kaniyang salita ay tumatakbong maliksi.

¹⁶Siya'y nagbibigay ng nieve na parang balahibo ng tupa;[#Job 37:6.]

Siya'y nagkakalat ng eskarcha na parang abo.

¹⁷Kaniyang inihahagis na parang putol na maliit ang kaniyang hielo:

Sinong makatatagal sa harap ng lamig niyaon?

¹⁸Kaniyang pinahahatdan ng salita, at tinutunaw:[#Job 37:10.]

Kaniyang pinahihihip ang kaniyang hangin, at ang tubig ay pinaagos.

¹⁹Kaniyang ipinabatid ang kaniyang salita sa Jacob,[#Deut. 33:2.]

Ang kaniyang mga palatuntunan at mga kahatulan sa Israel.

²⁰Siya'y hindi gumawa ng gayon sa alin mang bansa:[#Deut. 4:32, 33, 34.]

At tungkol sa kaniyang mga kahatulan, hindi nila nalaman.

Purihin ninyo ang Panginoon.