MGA AWIT 15

Ang mamamayan sa banal na Bundok. Awit ni David.

¹Panginoon, sinong makapanunuluyan sa iyong tabernakulo?

Sinong tatahan sa iyong banal na bundok?

²Siyang lumalakad na matuwid, at gumagawa ng katuwiran,

At nagsasalita ng katotohanan sa kaniyang puso.

³Siyang hindi naninirang puri ng kaniyang dila,[#Lev. 19:16; Awit 34:13.]

Ni gumagawa man ng kasamaan sa kaniyang kaibigan,

Ni dumudusta man sa kaniyang kapuwa.

⁴Na sa mga mata niya ay nasisiphayo ang masama;

Kundi siyang nagbibigay puri sa mga natatakot sa Panginoon,

Siyang sumusumpa sa kaniyang sariling ikasasama at hindi nagbabago,

⁵Siyang hindi naglalabas ng kaniyang salapi sa patubo, Ni kumukuha man ng suhol laban sa walang sala.[#Ex. 22:25; Deut. 23:19.; #Ex. 23:8.]

Siyang gumagawa ng mga bagay na ito ay hindi makikilos kailan man.