MGA AWIT 35

Panalangin sa pagliligtas sa kaaway. Awit ni David.

¹Awayin mo, Oh Panginoon, silang nagsisiaway sa akin:[#1 Sam. 24:16.]

Lumaban ka sa kanila na nagsisilaban sa akin.

²Humawak ka ng kalasag at ng longki,[#Awit 5:12.]

At tumayo ka na pinaka tulong sa akin.

³Kumuha ka rin naman ng sibat, at tumigil ka sa daan laban sa kanila na nagsisihabol sa akin:

Sabihin mo sa aking kaluluwa,

Ako'y iyong kaligtasan.

⁴Mangahiya nawa sila, at madala sa kasiraang puri ang nagsisiusig sa aking kaluluwa:[#Hanggang tal. 8; Awit 69:23-28; 109:6-15.]

Mangapabalik sila, at mangalito silang nagsisikatha ng aking kapahamakan.

⁵Maging gaya nawa sila ng ipa sa unahan ng hangin,[#Awit 1:4.]

At itaboy sila ng anghel ng Panginoon.

⁶Maging madilim nawa, at madulas ang kanilang daan,[#Jer. 23:12.]

At habulin sila ng anghel ng Panginoon.

⁷Sapagka't walang kadahilanan ay ipinagkubli nila ako ng kanilang silo sa hukay,[#Awit 9:15.]

Walang kadahilanan ay nagsihukay sila para sa aking kaluluwa.

⁸Dumating nawa sa kaniya ng walang anoano ang pagkapahamak;[#1 Tes. 5:3.]

At hulihin nawa siya ng kaniyang silo na kaniyang ikinubli:

Mahulog nawa siya sa ikapapahamak niya.

⁹At ang aking kaluluwa ay magagalak sa Panginoon:

Magagalak na mainam sa kaniyang pagliligtas.

¹⁰Lahat ng aking mga buto ay magsasabi, Panginoon, sino ang gaya mo,[#Ex. 15:11; Awit 71:19.]

Na inililigtas ang dukha doon sa totoong malakas kay sa kaniya,

Oo, ang dukha at ang mapagkailangan sa sumasamsam sa kaniya?

¹¹Mga saksing masasama ay nagsisitayo;

Sila'y nangagtatanong sa akin ng mga bagay na di ko nalalaman.

¹²Iginaganti nila sa akin ay kasamaan sa mabuti,[#Awit 38:20; Jer. 18:20; Juan 10:32.]

Sa pagpapaulila ng aking kaluluwa.

¹³Nguni't tungkol sa akin, nang sila'y may sakit, ang aking suot ay magaspang na kayo:

Aking pinagdalamhati ang aking kaluluwa ng pagaayuno;

At ang aking dalangin ay nagbabalik sa aking sariling sinapupunan.

¹⁴Ako'y nagasal na tila aking kaibigan o aking kapatid:

Ako'y yumuyukong tumatangis na tila iniiyakan ang kaniyang ina.

¹⁵Nguni't pagka ako'y natisod sila'y nangagagalak, at nagpipipisan:

Ang mga uslak ay nagpipisan laban sa akin, at hindi ko nalaman;

¹⁶Gaya ng mga nanunuyang suwail sa mga kapistahan,

Kanilang pinagngangalit sa akin ang kanilang mga ngipin.

¹⁷Panginoon, hanggang kailan titingin ka?[#Hab. 1:13.]

Iligtas mo ang aking kaluluwa sa kanilang mga pagsira,

Ang aking sinta mula sa mga leon.

¹⁸Ako'y magpapasalamat sa iyo sa dakilang kapisanan:[#Awit 22:25.]

Aking pupurihin ka sa gitna ng maraming tao.

¹⁹Huwag magalak sa akin na may kamalian ang aking mga kaaway;

Ni magkindat man ng mata ang nangagtatanim sa akin ng walang kadahilanan.

²⁰Sapagka't sila'y hindi nangagsasalita ng kapayapaan:

Kundi sila'y nagsisikatha ng mga magdarayang salita laban sa mga tahimik sa lupain.

²¹Oo, Kanilang ibinuka ng maluwang ang kanilang bibig laban sa akin;[#Awit 22:13.]

Kanilang sinasabi: Aha, aha, nakita ng aming mata.

²²Iyong nakita ito, Oh Panginoon; huwag kang tumahimik,[#Awit 28:1.]

Oh Panginoon, huwag kang lumayo sa akin.

²³Kumilos ka, at ikaw ay gumising upang gawan ako ng kahatulan,[#Awit 7:6.]

Sa aking usap, Dios ko at Panginoon ko.

²⁴Hatulan mo ako, Oh Panginoon kong Dios, ayon sa iyong katuwiran;[#Awit 26:1.]

At huwag mo silang pagalakin sa akin.

²⁵Huwag silang magsabi sa kanilang sarili: Aha, nasa namin:

Huwag silang magsabi: Aming sinakmal siya.

²⁶Mangapahiya nawa sila, at mangalito na magkakasama ang mga nangagalak sa aking pagkapahamak:[#tal. 4.]

Manganamit nawa ng kahihiyan at kasiraang puri ang nangagmamalaki laban sa akin.

²⁷Magsihiyaw nawa ng kagalakan, at mangasayahan, ang nagsisilingap ng aking katuwiran:

Oo, mangagsabi nawa silang palagi: Dakilain ang Panginoon,

Na nalulugod sa kaginhawahan ng kaniyang lingkod.

²⁸At ang aking dila ay mangungusap ng iyong katuwiran,[#Awit 51:14; 71:24.]

At ng pagpuri sa iyo sa buong araw.