MGA AWIT 72

Ang paghahari ng matuwid na hari. Awit ni Salomon.

¹Ibigay mo sa hari ang iyong mga kahatulan, Oh Dios,

At ang iyong katuwiran sa anak na lalake ng hari.

²Kaniyang hahatulan ang iyong bayan, ng katuwiran,[#Is. 11:3, 4; 32:1.]

At ang iyong dukha, ng kahatulan.

³Ang mga bundok ay magtataglay ng kapayapaan sa bayan,[#Awit 144:4; Is. 32:17.]

At ang mga gulod, sa katuwiran.

⁴Kaniyang hahatulan ang dukha sa bayan,

Kaniyang ililigtas ang mga anak ng mapagkailangan,

At pagwawaraywarayin ang mangaapi.

⁵Sila'y mangatatakot sa iyo habang nananatili ang araw,[#Awit 89:36, 37.]

At habang sumisilang ang buwan, sa lahat ng sali't saling lahi.

⁶Siya'y babagsak na parang ulan sa tuyong damo:[#2 Sam. 23:4.]

Gaya ng ambon na dumidilig sa lupa.

⁷Sa kaniyang mga kaarawan ay giginhawa ang mga matuwid;[#Awit 92:12.]

At saganang kapayapaan, hanggang sa mawala ang buwan.

⁸Siya naman ay magtataglay ng pagpapakapanginoon sa dagat at dagat,[#Ex. 23:31; Awit 2:8.]

At mula sa Ilog hanggang sa mga wakas ng lupa.

⁹Silang nagsisitahan sa ilang ay magsisiyukod sa kaniya;[#Awit 74:14.]

At hihimuran ng kaniyang mga kaaway ang alabok.

¹⁰Ang mga hari ng Tharsis, at sa mga pulo ay mangagdadala ng mga kaloob;[#1 Hari 5:10; 10:22.; #Is. 42:10.]

Ang mga hari sa Sheba at Seba ay mangaghahandog ng mga kaloob.

¹¹Oo, lahat ng mga hari ay magsisiyukod sa harap niya:

Lahat ng mga bansa ay mangaglilingkod sa kaniya.

¹²Sapagka't kaniyang ililigtas ang mapagkailangan pagka dumadaing;

At ang dukha na walang katulong.

¹³Siya'y maaawa sa dukha at mapagkailangan,

At ang mga kaluluwa ng mga mapagkailangan ay kaniyang ililigtas.

¹⁴Tutubusin niya ang kanilang kaluluwa sa kapighatian at karahasan;

At magiging mahalaga ang kanilang dugo sa kaniyang paningin:

¹⁵At siya'y mabubuhay at sa kaniya'y ibibigay ang ginto ng Sheba:

At dadalanginang lagi siya ng mga tao:

Pupurihin nila siya buong araw.

¹⁶Magkakaroon ng saganang trigo sa lupa sa taluktok ng mga bundok;

Ang bunga niyao'y uugang gaya ng Libano:

At silang sa bayan ay giginhawa na parang damo sa lupa.

¹⁷Ang kaniyang pangalan ay mananatili kailan man;[#Awit 89:36.]

Ang kaniyang pangalan ay magluluwat na gaya ng araw:

At ang mga tao ay pagpapalain sa kaniya;

Tatawagin siyang maginhawa ng lahat ng mga bansa.

¹⁸Purihin ang Panginoong Dios, ang Dios ng Israel,[#Awit 106:48; Luc. 1:68.]

Na siya lamang gumagawa ng mga kababalaghang bagay:

¹⁹At purihin ang kaniyang maluwalhating pangalan magpakailan man;

At mapuno ang buong lupa ng kaniyang kaluwalhatian.

Siya nawa, at Siya nawa.

²⁰Ang mga dalangin ni David na anak ni Isai ay nangatapos.