MGA AWIT 76

Sa Pangulong Manunugtog; sa mga panugtog na kawad. Salmo ni Asaph, Awit.

¹Sa Juda ay kilala ang Dios:[#Awit 48:1, 3.]

Ang kaniyang pangalan ay dakila sa Israel.

²Nasa Salem naman ang kaniyang tabernakulo,

At ang kaniyang dakong tahanan ay sa Sion.

³Doo'y binali niya ang mga pana ng busog;[#Awit 46:9.]

At kalasag, at ang tabak, at ang pagbabaka. (Selah)

⁴Maluwalhati ka at marilag, Mula sa mga bundok na hulihan.[#Awit 5:5.]

⁵Ang mga puso na matapang ay nasamsaman,

Sila'y nangatulog ng kanilang pagtulog;

At wala sa mga lalaking makapangyarihan na nakasumpong ng kanilang mga kamay.

⁶Sa iyong saway Oh Dios ni Jacob,[#Nah. 2:13.]

Ang karo at gayon din ang kabayo ay nahandusay sa mahimbing na pagkakatulog.

⁷Ikaw, ikaw ay katatakutan:

At sinong makatatayo sa iyong paningin, sa minsang ikaw ay magalit?

⁸Iyong ipinarinig ang hatol mula sa langit;

Ang lupa ay natakot, at tumahimik,

⁹Nang ang Dios ay bumangon sa paghatol,

Upang iligtas ang lahat ng maamo sa lupa. (Selah)

¹⁰Tunay na pupurihin ka ng poot ng tao:[#Ex. 9:10; Awit 65:7.]

Ang nalabi sa poot ay ibibigkis mo sa iyo.

¹¹Manata ka at tuparin mo sa Panginoon mong Dios:[#Awit 50:14.]

Magdala ng mga kaloob sa kaniya na marapat katakutan, yaong lahat na nangasa buong palibot niya.

¹²Kaniyang ihihiwalay ang diwa ng mga pangulo:

Siya'y kakilakilabot sa mga hari sa lupa.