MGA AWIT 82

Awit ni Asaph.

¹Ang Dios ay tumatayo sa kapisanan ng Dios;

Siya'y humahatol sa gitna ng mga dios.

²Hanggang kailan magsisihatol kayo ng kalikuan,

At magsisigalang sa mga pagkatao ng masama? (Selah)

³Hatulan mo ang dukha at ulila:

Gawan mo ng kaganapan ang napipighati at walang nagkakandili.

⁴Sagipin mo ang dukha at mapagkailangan:

Iligtas ninyo sila sa kamay ng masama,

⁵Hindi nila nalalaman, ni nauunawa man;

Sila'y nagsisilakad na paroo't parito sa kadiliman:

Lahat ng patibayan ng lupa ay nangakilos.

⁶Aking sinabi, Kayo'y mga dios,[#Juan 10:34.]

At kayong lahat ay mga anak ng Kataastaasan.

⁷Gayon ma'y mangamamatay kayong parang mga tao,[#Job 21:32; Awit 49:12.]

At mangabubuwal na parang isa sa mga pangulo.

⁸Bumangon ka, O Dios, hatulan mo ang lupa:

Sapagka't iyong mamanahin ang lahat ng mga bansa.