MGA AWIT 85

Sa Pangulong Manunugtog; Awit ng mga anak ni Core.

¹Panginoon, ikaw ay naging lingap sa iyong lupain:

Iyong ibinalik ang nangabihag ng Jacob.

²Iyong pinatawad ang kasamaan ng iyong bayan,[#Awit 32:1.]

Iyong tinakpan ang lahat nilang kasalanan, (Selah)

³Iyong pinawi ang buong poot mo:

Iyong tinalikdan ang kabangisan ng iyong galit.

⁴Ibalik mo kami, Oh Dios ng aming kaligtasan,[#Awit 80:3.]

At papaglikatin mo ang iyong galit sa amin.

⁵Magagalit ka ba sa amin magpakailan man?[#Awit 74:1.]

Iyo bang ipagpapatuloy ang iyong galit sa lahat ng sali't saling lahi?

⁶Hindi mo ba kami bubuhayin uli:

Upang ang iyong bayan ay magalak sa iyo?

⁷Ipakita mo sa amin ang iyong kagandahang-loob, Oh Panginoon,

At ipagkaloob mo sa amin ang iyong pagliligtas.

⁸Aking pakikinggan kung ano ang sasalitain ng Dios na Panginoon:[#Hab. 2:1.]

Sapagka't siya'y magsasalita ng kapayapaan sa kaniyang bayan at sa kaniyang mga banal:

Nguni't huwag silang manumbalik uli sa kaululan.

⁹Tunay na ang kaniyang pagliligtas ay malapit sa kanila na nangatatakot sa kaniya;

Upang ang kaluwalhatian ay tumahan sa aming lupain.

¹⁰Kaawaan at katotohanan ay nagsalubong;[#Awit 40:11; 89:14.]

Katuwiran at kapayapaan ay naghalikan.

¹¹Katotohanan ay bumubukal sa lupa;

At ang katuwiran ay tumungo mula sa langit.

¹²Oo, ibibigay ng Panginoon ang mabuti;[#Awit 84:12; Sant. 1:17.]

At ang ating lupain ay maguunlad ng kaniyang bunga.

¹³Katuwira'y mangunguna sa kaniya;

At gagawing daan ang kaniyang mga bakas.