1 Mga Taga-Corinto 2

¹Mga kapatid, nang pumunta ako diyan para ipahayag ang lihim na plano ng Diyos, hindi ako gumamit ng malalalim na pananalita o karunungan.

²Sapagkat ipinasya ko na wala akong ipangangaral sa inyo kundi si Hesu-Kristo lamang at ang kanyang pagkapako sa krus.

³Pumunta ako diyan na may kahinaan, at nanginginig pa sa takot.

⁴At nang mangaral ako sa inyo, hindi ako gumamit ng matatamis na pananalita batay sa karunungan ng tao para kumbinsihin kayo. Sa halip, pinatunayan ng Espiritu ang aking pangangaral sa pamamagitan ng kanyang kapangyarihan,

⁵nang sa ganooʼy hindi nakasalalay sa karunungan ng tao ang inyong pananampalataya kundi sa kapangyarihan ng Diyos.

Ipinahayag ng Espiritu ang Karunungan ng Diyos

⁶Kung sabagay, nagtuturo rin kami ng malalalim na karunungan sa mga matatag na sa pananampalataya, ngunit ang karunungang itoʼy hindi mula sa karunungan ng mundong ito, o sa mga namumuno sa mundong ito na nakatakda nang maglaho.

⁷Sa halip, ang karunungang sinasabi ko ay ang hiwaga ng Diyos na kanyang inilihim noon. Itoʼy itinalaga niya para sa ating kaluwalhatian bago pa man niya likhain ang mundo.

⁸Ang karunungang ito ay hindi naunawaan ng mga namumuno sa mundong ito. Sapagkat kung naunawaan nila, hindi sana nila ipinako sa krus ang dakilang Panginoon.

⁹Ganito nga ang sinasabi sa Kasulatan:

“Wala pang mga matang nakakita,

wala ring mga taingang nakarinig,

at wala pang taong nakaisip

sa mga bagay na inihanda ng Diyos

para sa mga nagmamahal sa kanya.”

¹⁰Ngunit ang mga bagay na itoʼy ipinahayag na sa atin ng Diyos sa pamamagitan ng kanyang Espiritu.

Sapagkat ang lahat ng bagay ay sinisiyasat ng Espiritu, maging ang mga malalalim na kaisipan ng Diyos.

¹¹Hindi baʼt walang nakakaalam sa iniisip ng isang tao maliban sa kanyang sariling espiritu? Ganoon din naman, walang nakakaalam sa iniisip ng Diyos maliban sa kanyang Espiritu.

¹²At ang Espiritu na ito ng Diyos ang tinanggap nating mga mananampalataya, hindi ang espiritu ng mundong ito, upang maunawaan natin ang mga pagpapalang ibinigay sa atin ng Diyos.

¹³Kaya nga ipinangangaral namin ang mga bagay na ito sa pamamagitan ng mga salitang mula sa Banal na Espiritu at hindi mula sa karunungan ng tao. Ipinangangaral namin ang espirituwal na mga bagay sa mga taong pinananahanan ng Espiritu.

¹⁴Ngunit ang taong hindi pinananahanan ng Espiritu ng Diyos ay hindi tumatanggap ng mga aral mula sa Espiritu dahil kamangmangan ito sa kanya. At hindi niya ito nauunawaan, dahil ang mga bagay na itoʼy maiintindihan lamang sa tulong ng Espiritu.

¹⁵Samantala, ang taong pinananahanan ng Espiritu ay nagsusuri sa lahat ng ito, ngunit siya mismo ay hindi masusuri ng ibang tao.

¹⁶Ayon nga sa sinasabi ng Kasulatan:

“Sino ba ang nakakaalam sa isip ng Panginoon?

Sino ba ang makakapagpayo sa kanya?”

Ngunit tayo, taglay natin ang isip ni Kristo.