The chat will start when you send the first message.
1Ngayon, sinabi ni Ahab kay Jezebel ang lahat ng ginawa ni Elias, at kung paano nito pinagpapatay ang lahat ng propeta ni Baal.
2Kaya nagpadala si Jezebel ng mensahero na magsasabi kay Elias, “Lubusan sana akong parusahan ng mga diyos kung sa ganitong oras bukas ay hindi ko pa nagagawa saʼyo ang tulad ng ginawa mong pagpatay sa mga propeta.”
3Natakot si Elias, kaya tumakas siya papunta sa Beer-seba na sakop ng Juda, at iniwan niya roon ang utusan niya.
4Pagkatapos, naglakad siya nang isang araw papuntang ilang. Nagpahinga siya at umupo sa ilalim ng punongkahoy at nanalangin na mamatay na lang sana siya. Sinabi niya, “Tama na po, Panginoon ! Kunin na lang ninyo ang buhay koʼt wala naman akong ipinagkaiba sa aking mga ninuno.”
5Pagkatapos, humiga siya sa ilalim ng punongkahoy, at nakatulog.
Biglang may anghel na kumalabit sa kanya at sinabi, “Bumangon ka at kumain.”
6Pagdilat niya, may nakita siyang tinapay sa ulunan niya, na niluto sa mainit na bato, at tubig na nakalagay sa sisidlan. Kumain siya at uminom, at nahigang muli.
7Bumalik ang anghel ng Panginoon , kinalabit si Elias at sinabi, “Bumangon ka at kumain, dahil malayo pa ang iyong lalakbayin.”
8Kaya bumangon si Elias, kumain, at uminom. Pinalakas siya ng kanyang kinain, at naglakbay siya sa loob ng apatnapung araw at apatnapung gabi, hanggang makarating siya sa Horeb, ang bundok ng Diyos.[#19:8 : O Sinai.]
9Pumasok siya sa isang kuweba at doon nagpalipas ng gabi.
Ngayon, sinabi sa kanya ng Panginoon , “Ano ang ginagawa mo rito Elias?”
10Sumagot siya, “O Panginoon , Diyos ng mga Hukbo, tapat po akong naglilingkod sa inyo. Ngunit tinalikuran ng mga Israelita ang kasunduan nila sa inyo, winasak nila ang mga altar ninyo, at pinagpapatay ang mga propeta ninyo. Ako na lang po ang natira, at pinagsisikapan din nila akong patayin.”
11Nagsalita ang Panginoon , “Lumabas ka at tumayo sa ibabaw ng bundok sa aking presensya, dahil dadaan ako.”
Pagkatapos, may dumaan na napakalakas na hangin, na bumitak sa mga bundok at dumurog sa mga bato, ngunit wala ang Panginoon sa hangin. Pagkatapos ng hangin, lumindol, ngunit wala rin ang Panginoon sa lindol.
12Pagkatapos ng lindol, may apoy na dumating, ngunit wala pa rin ang Panginoon sa apoy. Pagkatapos ng apoy, may narinig siyang tinig na parang bulong.
13Nang marinig ito ni Elias, nagtakip siya ng kanyang mukha gamit ang kanyang balabal, lumabas siya at tumayo sa bungad ng kuweba.
Biglang may tinig na nagsabi sa kanya, “Ano ang ginagawa mo rito, Elias?”
14Sumagot siya, “O Panginoon , Diyos ng mga Hukbo, tapat po akong naglilingkod sa inyo, pero itinakwil ng mga Israelita ang kasunduan nila sa inyo, winasak nila ang mga altar ninyo, at pinagpapatay ang mga propeta ninyo. Ako na lang po ang natitira, at pinagsisikapan din nila akong patayin.”
15Nagsalita ang Panginoon sa kanya, “Bumalik ka sa iyong dinaanan, at pumunta sa ilang ng Damasco. Pagdating mo roon, pahiran mo ng langis si Hazael bilang hari ng Aram.
16Pahiran mo rin si Jehu na anak ni Nimsi bilang hari ng Israel, at si Eliseo na anak ni Shafat, na taga-Abel-mehola, upang pumalit sa iyo bilang propeta.
17Papatayin ni Hazael ang mga sumasamba kay Baal. Ang makakatakas sa kanyaʼy papatayin ni Jehu, at ang makakatakas kay Jehu ay papatayin ni Eliseo.
18Ngunit ililigtas ko ang pitong libong Israelita na hindi lumuhod at humalik sa imahen ni Baal.”
19Umalis doon si Elias at nakita niya si Eliseo na anak ni Shafat, na nag-aararo gamit ang isang pares na baka. May labing-isang pares na baka sa unahan niya na pinag-aararo ng mga kasama niya. Lumapit si Elias sa kanya, hinubad ang kanyang balabal at pinasa ito kay Eliseo.
20Iniwan ni Eliseo ang mga baka at hinabol si Elias. Sinabi ni Eliseo, “Hahalik po muna ako sa aking amaʼt ina bilang pamamaalam at saka po ako sasáma sa inyo.” Sumagot si Elias, “Sige, pero huwag mong kalimutan ang ginawa ko sa iyo.”
21Kaya bumalik si Eliseo, kinuha ang kanyang mga baka, at kinatay. Ginawa niyang panggatong sa pagluluto ng karne ng mga baka ang mga kagamitan sa pag-aararo. Pagkaluto, binigyan niya ang kanyang mga kasamang nag-aararo, at kumain silang lahat. At agad siyang sumunod kay Elias upang maging lingkod nito.