1 Mga Hari 6

Ipinatayo ni Solomon ang Templo

¹Sinimulan ni Solomon ang pagpapatayo ng Templo ng Panginoon noong ikalawang buwan, ang buwan ng Ziv, ng ikaapat na taon ng paghahari niya sa Israel. Ika-apat na raan at walumpung taon iyon ng paglaya ng mga Israelita sa Ehipto.

²Ang Templo na ipinatayo ni Haring Solomon para sa Panginoon ay 90 talampakan ang haba, 30 talampakan ang luwang at 45 talampakan ang taas.

³Ang luwang ng balkonahe ng Templo ay 15 talampakan, at ang haba ay 30 talampakan na katulad mismo ng luwang ng Templo.

⁴Nagpagawa rin si Solomon ng mga bintana sa Templo. Mas malaki ang sukat nito sa loob kaysa sa labas.

⁵Nagpagawa rin siya ng mga kuwarto sa mga gilid at likod ng Templo. Ang mga kuwartong ito ay may tatlong palapag at nakadugtong sa pader ng Templo.

⁶Ang luwang ng unang palapag ay pitoʼt kalahating talampakan, siyam na talampakan ang pangalawang palapag at ang pangatlong palapag naman ay sampuʼt kalahating talampakan. Ang pader ng Templo ay unti-unting numinipis sa bawat palapag upang maipatong ang mga kuwarto sa pader nang hindi na kailangan ng mga biga.

⁷Nang ipinatayo ang Templo, ang mga batong ginamit ay tinabas na sa pinagkunan nito, kaya wala nang maririnig na pukpok ng martilyo, palakol o anumang gamit na bakal.

⁸Ang daanan papasok sa unang palapag ay nasa bandang timog ng Templo. May mga hagdan papuntang pangalawa at pangatlong palapag.

⁹Nang nailagay na ang mga dingding ng Templo, pinalagyan ito ni Solomon ng kisame na ang mga tabla ay sedro.

¹⁰At ang mga kuwarto sa mga gilid at likod ng Templo, na ang taas ay pitoʼt kalahating talampakan, na nakakabit sa Templo ay ginamitan din ng mga bigang sedro.

¹¹Sinabi ng Panginoon kay Solomon,

¹²“Kung tutuparin mo ang aking mga tuntunin at mga utos, tutuparin ko rin sa pamamagitan mo ang ipinangako ko kay David na iyong ama.

¹³Maninirahan ako kasama ng mga Israelita sa Templong ito na iyong ipinatayo at hindi ko sila pababayaan.”

¹⁴Natapos ni Solomon ang pagpapatayo ng Templo.

¹⁵Ang dingding sa loob ng Templo ay natatakpan ng tablang sedro mula sa sahig hanggang sa kisame, at ang sahig ay tablang sipres.

¹⁶Nagpagawa si Solomon ng dalawang kuwarto sa loob ng Templo sa pamamagitan ng paglalagay ng dibisyon mula sa sahig hanggang kisame. Ang ginamit na dibisyong tabla ay sedro. Ang kuwarto sa pinakaloob ng Templo ay tinawag na Pinakabanal na Lugar at ang haba nito ay 30 talampakan.

¹⁷Ang haba naman ng kuwarto sa labas ng Pinakabanal na Lugar ay 60 talampakan.

¹⁸Ang buong dingding sa loob ng Templo ay natatakpan ng tablang sedro kaya hindi makita ang mga bato sa dingding. May mga iniukit din ditong mga bulaklak at mga halamang gumagapang.

¹⁹Ipinahanda ni Solomon ang Pinakabanal na Lugar sa loob ng Templo kung saan ilalagay ang Kahon ng Kasunduan ng Panginoon .

²⁰Ang kuwartong ito ay kuwadrado; ang haba, luwang at taas ay pare-parehong 30 talampakan. Ang mga dingding at kisame nito ay pinatakpan ni Solomon ng purong ginto at ganoon din ang altar na gawa sa sedro.

²¹Ang ibang bahagi ng loob ng Templo ay pinatakpan din niya ng purong ginto. Nagpagawa siya ng gintong kadena at ipinatali niya ito ng pahalang sa daanan na papasok sa Pinakabanal na Lugar.

²²Kaya natatakpan lahat ng ginto ang loob ng Templo, pati na ang altar na nasa loob ng Pinakabanal na Lugar.

²³Nagpalagay si Solomon sa loob ng Pinakabanal na Lugar ng dalawang kerubin na gawa sa kahoy na olibo, at may taas na labinlimang talampakan ang bawat isa.[#6:23 : Isang uri ng anghel.]

^24-25Ang dalawang kerubin ito ay magkasinglaki at magkasinghugis. Ang bawat isa ay may dalawang pakpak, at bawat pakpak ay may habang pitoʼt kalahating talampakan. Kaya ang haba mula sa dulo ng isang pakpak hanggang sa dulo ng isa pang pakpak ay 15 talampakan.

²⁶Ang bawat kerubin ay may taas na 15 talampakan.

²⁷Pinagtabi ito ni Solomon sa loob ng Pinakabanal na Lugar na nakalukob ang mga pakpak. Ang isa nilang pakpak ay nagpapang-abot, at nakatutok sa gitna ng kuwarto. At ang kabilang pakpak naman ay nakasayad sa dingding.

²⁸Pinatakpan din ni Solomon ng ginto ang dalawang kerubin.

²⁹Ang lahat ng dingding sa dalawang kuwarto ng Templo ay pinaukitan ni Solomon ng mga kerubin, mga palma at mga bulaklak na nakabukadkad.

³⁰Kahit ang sahig sa dalawang kuwarto ay pinatakpan din niya ng ginto.

³¹Ang pintuang papasok sa Pinakabanal na Lugar ay may dalawang pinto na gawa sa kahoy ng olibo at lima ang gilid ng mga hamba nito.

³²Ang mga pintong ito ay pinaukitan ni Solomon ng mga kerubin, mga palma at mga namumukadkad na bulaklak, at pinabalutan ng ginto.

³³Ang daanan papasok sa Templo ay pinagawan din ni Solomon ng parihabang mga hamba na gawa sa kahoy na olibo.

³⁴May dobleng pinto din ito na gawa sa kahoy na sipres at ang bawat isa nito ay may dalawang hati na maaaring itiklop.

³⁵Pinaukitan din ito ni Solomon ng mga kerubin, mga palma at mga namumukadkad na bulaklak, at maayos na binalutan ng ginto.

³⁶Ipinagawa rin niya ang loob ng bakuran ng Templo. Napapaligiran ito ng pader na ang bawat tatlong patong ng mga batong tinabas ay pinatungan ng kahoy na sedro.

³⁷Inilagay ang pundasyon ng Templo ng Panginoon nang ikalawang buwan, na siyang buwan ng Ziv, noong ikaapat na taon ng paghahari ni Solomon.

³⁸Natapos ang Templo sa ikawalong buwan, na siyang buwan ng Bul, noong ikalabing-isang taon ng paghahari ni Solomon, alinsunod sa mga detalyeng nakasaad sa plano. Pitong taon ang ginugol niya sa pagpapatayo ng Templo.