The chat will start when you send the first message.
1Nasabi ni David sa kanyang sarili, “Darating ang araw na papatayin ako ni Saul. Mabuti pang tumakas ako papunta sa lupain ng mga Filisteo para tumigil na siya sa paghahanap sa akin sa Israel at makaligtas ako sa kanya.”
2Kaya pumunta si David at ang 600 niyang tauhan kay Haring Aquis ng Gat, na anak ni Maok.
3Doon sila tumira sa Gat sa pangangalaga ni Aquis, kasama ang kani-kanilang pamilya. Dinala ni David ang dalawa niyang asawa na si Ahinoam na taga-Jezreel at si Abigail na taga-Carmel, na biyuda ni Nabal.
4Nang mabalitaan ni Saul na tumakas si David at pumunta sa Gat, hindi na niya ito hinanap.
5Isang araw, sinabi ni David kay Aquis, “Kung naging mabuti po ako sa inyong paningin, maaari po bang sa isang bayan sa ibang lalawigan kami tumira? Hindi po kasi kami nararapat tumira rito sa lungsod na tinitirhan ninyo bilang hari.”
6Kaya nang araw na iyon, ibinigay sa kanya ni Aquis ang lugar ng Ziklag. Kaya hanggang ngayon sakop ito ng mga hari ng Juda.
7Tumira si David sa teritoryo ng mga Filisteo sa loob ng isang taon at apat na buwan.
8Nang panahong iyon, sinalakay ni David at ng mga tauhan niya ang mga taga-Gesur, Gizrita at mga Amalekita. Mula pa noong una, ang mga taong itoʼy nakatira na sa lugar na malapit sa Shur papuntang Ehipto.
9Kapag sumasalakay sila David, pinapatay nila ang lahat ng lalaki at babae, at kinukuha ang mga tupa, baka, asno, kamelyo at pati na rin ang mga damit. Pagkatapos, bumabalik sila kay Aquis.
10Kapag itinatanong ni Aquis kung saan sila sumalakay nang araw na iyon, sinasabi nilang sinalakay nila ang Negeb sa Juda, o sa bahagi ng Negeb na tinitirhan ng mga Jerameelita o sa bahagi ng Negeb na tinitirhan ng mga Cineo.
11Pinapatay nina David ang lahat ng lalaki at babae para walang makarating sa Gat at sabihin kung ano talaga ang ginawa nila. Ito ang madalas niyang ginagawa habang naroon siya sa teritoryo ng mga Filisteo.
12Pinagkakatiwalaan ni Aquis si David kaya nasabi niya sa kanyang sarili, “Natitiyak kong kinamumuhian na si David ng mga kapwa niya Israelita kaya habambuhay na siyang maglilingkod sa akin.”