1 Timoteo 4

¹Maliwanag ang sinasabi ng Espiritu na sa mga huling araw ay may mga tatalikod sa kanilang pananampalataya sa Diyos. Susunod sila sa mga mapanlinlang na espiritu at sa mga katuruan ng mga demonyo.

²Ang mga katuruang itoʼy itinuturo ng mga taong mandaraya at sinungaling. Manhid na ang kanilang konsensiya na parang pinaso ng napakainit na bagay.

³Ipinagbabawal nila ang pag-aasawa at ang ilang uri ng pagkain, kahit na nilikha ng Diyos ang mga pagkaing ito para tanggapin nang may pasasalamat ng mga sumasampalataya at nakakaalam sa katotohanan.

⁴Sapagkat ang lahat ng nilikha ng Diyos ay mabuti, at dapat walang ituring na masama kung tinatanggap nang may pasasalamat,

⁵dahil nilinis ito ng salita ng Diyos at ng panalangin.

⁶Magiging mabuti kang lingkod ni Kristo Hesus kung ituturo mo sa mga kapatid ang mga bagay na ito. At sa pagtuturo mo sa kanila, lalago ka rin sa pamamagitan ng mga katotohanan ng pananampalataya natin at ng mabuting aral na sinusunod mo.

⁷Huwag mong pag-aksayahan ng panahon ang mga walang kabuluhang alamat na sabi-sabi lang ng matatanda. Sa halip, sanayin mo sa kabanalan ang iyong sarili.

⁸Ang pagsasanay ng katawan ay may mabuting naidudulot, ngunit ang banal na pamumuhay ay higit na kapakipakinabang, sapagkat itoʼy may pangako hindi lang sa buhay na ito, kundi maging sa buhay na darating.

⁹Mapagkakatiwalaan ang salitang ito at karapat-dapat tanggapin ng lahat.

¹⁰At ito ang dahilan kung bakit nagsisikap at nagtitiyaga tayo sa pagtuturo sa mga tao, dahil umaasa tayo sa Diyos na buháy na siyang Tagapagligtas ng lahat ng tao, lalo na ng mga mananampalataya.

¹¹Iutos at ituro mo ang mga bagay na ito.

¹²Huwag mong hayaang hamakin ka ninuman dahil sa iyong kabataan. Sa halip, maging halimbawa ka sa mga mananampalataya sa iyong pananalita, pag-uugali, pag-ibig, pananampalataya at malinis na pamumuhay.

¹³Habang wala pa ako riyan, gamitin mo ang panahon mo sa pagbabasa ng Kasulatan sa mga tao, sa pangangaral at pagtuturo.

¹⁴Huwag mong pababayaan ang kaloob sa iyo ng Banal na Espiritu ayon sa inihayag ng mga pinuno ng iglesya nang ipatong nila ang kamay nila sa iyo.

¹⁵Gawin mo ang mga tungkuling ito at lubos mong italaga ang sarili mo sa mga ito upang makita ng lahat ang paglago mo.

¹⁶Maging maingat ka sa iyong pamumuhay at pagtuturo. Patuloy mong gawin ang mga bagay na ito, sapagkat sa paggawa mo nito ay maliligtas ka at ang mga nakikinig sa iyo.