1 Timoteo 6

¹Sa mga alipin na mananampalataya, dapat igalang nila nang lubos ang mga amo nila upang hindi lapastanganin ng mga tao ang Diyos at wala silang masabi laban sa itinuturo natin.

²At kung mga mananampalataya rin ang amo nila, hindi sila dapat mawalan ng paggalang dahil lang sa magkakapatid sila sa pananampalataya. Sa halip, lalo pa nga nilang dapat pagbutihin ang paglilingkod sa kanilang amo dahil kapwa nila mananampalataya ang nakikinabang sa paglilingkod nila, at mahal din ng Diyos.

Mga Maling Aral at ang Pag-ibig sa Salapi

Ituro mo ang mga bagay na ito at hikayatin silang sundin ito.

³Kung may nagtuturo man nang salungat dito at hindi naaayon sa tamang turo ng ating Panginoong Hesu-Kristo, at mga turo tungkol sa pagsunod sa Diyos,

⁴ang taong itoʼy mayabang pero wala namang nalalaman. Gusto lang niyang makipagtalo na nauuwi lang naman sa inggitan, alitan, paninira, pambibintang,

⁵at walang tigil na awayan. Ito ang ugali ng taong baluktot ang pag-iisip at hindi na nakakaalam ng katotohanan. Inaakala nilang ang kabanalan ay paraan ng pagpapayaman.

⁶Kung sabagay, daig pa ng taong namumuhay nang banal at kontento na sa kalagayan ang mayaman.

⁷Ang totoo, wala tayong dinala sa mundong ito, at wala rin tayong madadala pag-alis dito.

⁸Kaya kung mayroon na tayong pagkain at pananamit, dapat na tayong makontento.

⁹Ang mga taong naghahangad yumaman ay nahuhulog sa tukso, sa isang bitag ng mapanira at walang kabuluhang mga hangarin na nagdadala sa kanila sa kamatayan at kapahamakan.

¹⁰Sapagkat ang pag-ibig sa salapi ang siyang ugat ng lahat ng kasamaan. Ang sobrang paghahangad ng salapi ang nagtulak sa iba na tumalikod sa pananampalataya at nagdulot ng maraming paghihinagpis sa buhay nila.

Ang mga Huling Tagubilin kay Timoteo

¹¹Ngunit ikaw, bilang lingkod ng Diyos, iwasan mo ang mga bagay na iyan. Sikapin mong mamuhay nang matuwid, banal, may matibay na pananampalataya, mapagmahal, mapagtiis at mabait sa kapwa.

¹²Ipaglaban mong mabuti ang pananampalataya. Panghawakan mong mabuti ang buhay na walang hanggan, dahil tinawag ka ng Diyos para sa buhay na ito nang ipahayag mo ang pananampalataya mo sa harap ng maraming saksi.

¹³Sa presensya ng Diyos na nagbibigay-buhay sa lahat, at sa presensya ni Kristo Hesus na nagpatotoo sa harap ni Poncio Pilato, inuutusan kitang

¹⁴sundin nang mabuti ang mga iniutos sa iyo upang walang maipintas sa iyo. Gawin mo ito hanggang sa pagdating ng ating Panginoong Hesu-Kristo.

¹⁵Sa takdang panahon, ihahayag siya ng dakila at makapangyarihang Diyos, ang Hari ng mga hari, at Panginoon ng mga panginoon.

¹⁶Siya lang ang walang kamatayan, at nananahan sa di-malapit-lapitang liwanag. Hindi siya nakita o maaaring makita ninuman. Sa kanya ang karangalan at walang hanggang kapangyarihan. Amen.

¹⁷Sabihin mo sa mga mayayaman sa mundong ito na huwag silang maging mayabang o umasa sa kayamanan nilang madaling mawala. Sa halip, umasa sila sa Diyos na nagkakaloob sa atin ng lahat ng bagay na ikasisiya natin.

¹⁸Turuan mo silang gumawa ng mabuti, maging mayaman sa mabubuting gawa, at mapagbigay at matulungin sa kapwa.

¹⁹Sa gayon, makakapag-ipon sila ng kayamanang magiging matatag na pundasyon nila sa hinaharap, at matatamo nila ang tunay na buhay.

²⁰Timoteo, ingatan mo ang mga aral na ipinagkatiwala sa iyo. Iwasan mo ang mga walang kabuluhang usap-usapan na ipinapalagay ng iba na karunungan, pero sumasalungat sa itinuturo natin.

²¹Dahil sa ganyang pagmamarunong ng ilan, nalihis sila sa pananampalataya.

Sumainyong lahat nawa ang biyaya ng Diyos.