The chat will start when you send the first message.
1Nang matapos ni Solomon ang lahat ng gawain na kanyang ipinagawa para sa Templo ng Panginoon , inilagay niya sa kabang-yaman ng Templo ang lahat ng bagay na itinalaga ng ama niyang si David pati na ang ginto, pilak at iba pang kagamitan.
2Ipinatawag ni Haring Solomon sa Jerusalem ang mga pinuno ng Israel at ang lahat ng pinuno ng mga lahi at ng mga pamilya sa Israel upang kunin ang Kahon ng Kasunduan ng Panginoon mula sa Zion, ang Lungsod ni David.
3Kayaʼt pumunta ang mga kalalakihan ng Israel sa harapan ng hari noong panahon ng Pista ng Pagtatayo ng mga Kubol, nang ikapitong buwan.
4Nang makarating na ang lahat ng pinuno ng Israel, binuhat ng mga Levita ang Kahon.
5Dinala ito ng mga pari at ng mga Levita kasama ang Toldang Tipanan at ang mga banal na kagamitan nito sa loob ng Templo.
6Naghandog si Haring Solomon at ang buong mamamayan ng Israel sa harapan ng Kahon. Napakaraming tupa at baka ang kanilang inihandog, hindi ito mabilang dahil sa dami.
7Pagkatapos, dinala ng mga pari ang Kahon ng Kasunduan ng Panginoon sa lugar nito roon sa pinakaloob ng Templo, sa Pinakabanal na Lugar, sa ilalim ng mga pakpak ng mga kerubin.
8Nakalukob ang pakpak ng mga kerubin kaya natatakpan ang Kahon at ang mga hawakang pasanan nito.
9Ang mga hawakang pasanan ay napakahaba kaya ang mga dulo nito ay tanaw mula sa Banal na Lugar, sa harapan ng pinakaloob ng Templo, ngunit hindi kita mula sa labas ng Banal na Lugar. Ang mga ito ay naroon pa rin hanggang ngayon.
10Walang ibang laman ang Kahon maliban sa dalawang malalapad na bato na inilagay ni Moises noong nandoon siya sa Horeb, kung saan gumawa ng kasunduan ang Panginoon sa mga Israelita pagkatapos nilang lumabas sa Ehipto.
11Pagkatapos, lumabas ang mga pari sa Banal na Lugar. Ang lahat ng pari na naroon ay nagpakalinis, oras man ng kanilang paglilingkod o hindi.
12Ang mga musikerong Levita na sina Asaf, Heman, Jedutun at ang kanilang mga anak at mga kamag-anak ay tumayo sa bandang silangan ng altar. Nakasuot sila ng pinong lino at tumutugtog ng pompyang, alpa at lira. Sinasamahan sila ng 120 pari na nagpapatunog ng trumpeta.
13Ang mga mang-aawit ay nagpuri at nagpasalamat sa Panginoon na tinutugtugan ng mga trumpeta, pompyang at iba pang mga instrumento. Ito ang kanilang inaawit:
“Ang Panginoon ay mabuti;
ang pag-ibig niyaʼy walang hanggan.”
Pagkatapos, may ulap na bumalot sa Templo ng Panginoon .
14Hindi na makaganap ang mga pari ng kanilang gawain sa Templo dahil sa ulap, dahil binalot ng makapangyarihang presensya ng Panginoon ang kanyang Templo.