Mga Gawa 12

Ang Himalang Pagkatakas ni Pedro sa Bilangguan

¹Nang panahong iyon, sinimulang dakpin ni Haring Herodes ang ilang miyembro ng iglesya para usigin sila.[#12:1 : Itoʼy si Herodes Agripa I. Siyaʼy apo ni Herodes na makikita sa Mat. 2:1; 14:1.]

²Ipinapatay niya si Santiago na kapatid ni Juan sa pamamagitan ng espada.

³Nang makita niyang natuwa ang mga Hudyo, ipinahuli niya rin si Pedro. Nangyari ito sa panahon ng Pista ng Tinapay na Walang Pampaalsa.

⁴Ipinabilanggo niya si Pedro at pinabantayan sa apat na grupo ng mga sundalo na may tig-apat na tauhan. Ayon sa plano ni Herodes, ang paglilitis kay Pedro ay gagawin niya sa harap ng taong-bayan pagkatapos ng Pista ng Paglampas ng Anghel.

⁵Kaya nanatili si Pedro sa bilangguan ngunit ang iglesya namaʼy nananalangin sa Diyos ng taimtim para sa kanya.

⁶Noong gabi bago siya iharap ni Herodes sa mga tao upang litisin, natutulog si Pedro na nakagapos ng kadena sa magkabilang braso, isa para sa bawat sundalong nasa kanan at kaliwa niya. Mayroon pang mga guwardiyang nakabantay sa pintuan ng bilangguan.

⁷Walang anu-anoʼy biglang nagliwanag sa loob ng bilangguan at nagpakita ang isang anghel ng Panginoon. Tinapik niya sa tagiliran si Pedro para magising, at sinabi, “Dali, bumangon ka!” At natanggal ang mga kadena sa kanyang mga kamay.

⁸Sinabi ng anghel, “Magbihis ka at isuot mo ang iyong sandalyas.” At ganoon nga ang ginawa ni Pedro. Sinabi pa ng anghel sa kanya, “Magbalabal ka at sumunod sa akin.”

⁹At sumunod nga siya sa anghel palabas ng bilangguan. Hindi alam ni Pedro kung totoo ang nangyayari. Ang akala niyaʼy nananaginip lang siya.

¹⁰Dinaanan lang nila ang una at ang pangalawang grupo ng mga guwardiya. Pagdating nila sa pintuang bakal na patungo sa loob ng lungsod, kusa itong bumukas kaya lumabas sila. Paglampas nila sa isang kalye, bigla na lang siyang iniwan ng anghel.

¹¹Saka lang napagtanto ni Pedro na hindi pala siya nananaginip. Sinabi niya, “Totoo pala talagang ipinadala ng Panginoon ang kanyang anghel, at iniligtas niya ako sa kamay ni Herodes at sa lahat ng inaasahan ng mga Hudyo na mangyayari sa akin.”

¹²Nang maunawaan niya ang nangyari, pumunta siya sa bahay ni Maria na ina ni Juan na tinatawag ding Marcos. Maraming tao ang nagkakatipon doon para manalangin.

¹³Kumatok si Pedro sa pinto ng bakuran, at lumapit ang utusang si Roda para alamin kung sino ang kumakatok.

¹⁴Nang makilala niya ang boses ni Pedro, sobra siyang natuwa at tumakbo papasok na hindi binubuksan ang pinto. Sinabi niya, “Nasa pinto si Pedro!”

¹⁵Sinabi nila kay Roda, “Nasisiraan ka na yata ng bait!” Ngunit ipinagpilitan niyang si Pedro nga ang nasa labas. Kaya sinabi nila, “Baka anghel iyon ni Pedro.”

¹⁶Samantala, patuloy pa rin sa pagkatok si Pedro kaya binuksan nila ang pinto. Nang makita nilang siya nga iyon, hindi sila makapaniwala.

¹⁷Sinenyasan sila ni Pedro na tumahimik, at ikinuwento niya sa kanila kung paano siya pinalabas ng Panginoon sa bilangguan. Ibinilin niya sa kanila na ipaalam ito kay Santiago at sa iba pang mga kapatiran. Pagkatapos, umalis siya at pumunta sa ibang lugar.

¹⁸Kinaumagahan, nagkakagulo ang mga guwardiya dahil wala na si Pedro at hindi nila alam kung ano ang nangyari sa kanya.

¹⁹Nag-utos si Herodes na hanapin siya, ngunit hindi nila siya natagpuan. Kaya pinaimbestigahan niya ang mga guwardiya at ipinapatay. Pagkatapos, umalis si Herodes sa Judea. Pumunta siya sa Cesarea at nanatili doon.

Ang Pagkamatay ni Herodes

²⁰Galit na galit si Herodes sa mga taga-Tiro at taga-Sidon. Kaya nagkaisa ang mga tao na makipag-ayos sa hari dahil sa bayan nito nanggagaling ang kanilang pagkain. Bago sila pumunta sa kanya, kinaibigan muna nila si Blasto para tulungan sila, dahil katiwala siya ng hari.

²¹Nang dumating ang takdang araw, si Herodes, suot ang kanyang maharlikang damit, ay umupo sa kanyang trono at nagbigay ng talumpati sa mga tao.

²²Sumigaw ang mga tao, “Isang diyos ang nagsasalita at hindi tao!”

²³Nang oras ding iyon, pinarusahan siya ng anghel ng Panginoon, dahil hindi niya ibinigay sa Diyos ang papuri. Inuod siya at namatay.

²⁴Kaya patuloy na lumaganap ang salita ng Diyos at lalo pang dumami ang mga mananampalataya.

Isinugo sina Bernabe at Saulo

²⁵Samantala, bumalik sina Bernabe at Saulo sa Antioquia mula sa Jerusalem matapos nilang maihatid ang tulong sa mga kapatid. Isinama rin nila si Juan Marcos.[#12:25 : Ito ang nasa ibang tekstong Griyego. Sa iba pang mga kopya, sa Jerusalem. Sa iba pang mga kopya, galing sa Jerusalem.]