Mga Gawa 3

Pinagaling ni Pedro ang Isang Pulubing Lumpo

¹Isang araw, bandang alas tres ng hapon, pumunta sina Pedro at Juan sa Templo. Oras noon ng pananalangin.

²Samantala, may isang lalaking lumpo mula pagkasilang ang binubuhat papuntang Templo. Araw-araw siyang dinadala sa pintuang tinatawag na Maganda, para makapanglimos sa mga taong pumapasok sa Templo.

³Nang makita niya sina Pedro at Juan na papasók, humingi siya ng limos.

⁴Tinitigan siya nina Pedro at Juan. Pagkatapos, sinabi ni Pedro sa kanya, “Tumingin ka sa amin.”

⁵Tumingin ang lalaki sa kanila na naghihintay na malimusan.

⁶Ngunit sinabi ni Pedro sa kanya, “Wala ako ni isang kusing. Ngunit ibibigay ko saʼyo kung anoʼng mayroon ako. Sa pangalan ni Hesu-Kristo na taga-Nazaret, tumayo ka at lumakad!”[#3:6 : Sa literal, pilak o ginto.]

⁷At hinawakan ni Pedro ang kanang kamay nito upang tulungang tumayo. Biglang lumakas ang kanyang mga paa at bukong-bukong.

⁸Palukso siyang tumayo at nagsimulang maglakad-lakad. Pagkatapos, pumasok siya sa Templo kasama nina Pedro at Juan habang palakad-lakad at patalon-talon na nagpupuri sa Diyos.

⁹Nakita siya ng lahat ng tao roon na naglalakad at nagpupuri sa Diyos.

¹⁰Nang mapansin nila na siya pala iyong palaging nakaupo at namamalimos doon sa pintuan ng Templo na tinatawag na Maganda, lubos silang namangha.

Nangaral si Pedro sa Templo

¹¹Samantala, habang nakakapit ang lalaking iyon kina Pedro at Juan, nagtakbuhan ang mga tao palapit sa kanila sa bahagi ng Templo na tinatawag na Balkonahe ni Solomon dahil manghang-mangha sila.

¹²Pagkakita ni Pedro sa mga tao, sinabi niya sa kanila, “Mga kapwa ko Israelita, bakit kayo namamangha sa pangyayaring ito? Bakit ninyo kami tinitingnan na para bang napalakad namin ang taong ito dahil sa sarili naming kapangyarihan o kabanalan?

¹³Ang Diyos ng ating mga ninunong sina Abraham, Isaac, at Jacob ang siyang gumawa nito upang luwalhatiin ang kanyang lingkod na si Hesus. Ang Hesus na ito ang isinakdal at itinakwil ninyo sa harapan ni Pilato, kahit napagpasyahan na niyang pakawalan siya.

¹⁴Siya ang Banal at Matuwid, ngunit itinakwil ninyo siya, at sa halip mas pinili pa ninyong hilingin na pakawalan ang isang mamamatay-tao.

¹⁵Pinatay nʼyo ang nagbibigay ng buhay, ngunit binuhay siyang muli ng Diyos. Kami ay saksi sa muli niyang pagkabuhay.

¹⁶Ang pananampalataya sa pangalan ni Hesus ang siyang nagpalakas sa taong ito na inyong nakikita at nakikilala. Kayo rin ay mga saksi na gumaling siya. Ang pananampalataya kay Hesus ang nagpagaling sa kanya nang ganap gaya ng nakikita ninyo ngayon.

¹⁷“Mga kapatid, alam kong ginawa ninyo iyon kay Hesus dahil hindi nʼyo alam kung sino talaga siya, gayundin ang inyong mga pinuno.

¹⁸Ngunit sa ganitong paraan, natupad ang sinabi ng Diyos sa pamamagitan ng mga propeta, na ang Mesias ay kinakailangang magdusa.

¹⁹Kaya ngayon, magsisi na kayo at magbalik-loob sa Diyos upang patawarin niya ang inyong mga kasalanan.

²⁰Kapag ginawa ninyo ito, mararanasan ninyo ang panahon ng kaginhawahang mula sa Panginoon, at isusugo niya si Hesus, ang Mesias na itinalaga niya noon para sa inyo.

²¹Ngunit kinakailangang manatili muna si Hesus sa langit hanggang sa dumating ang panahon ng pagpapanumbalik ng lahat ng mga bagay. Iyan ang ipinangako ng Diyos noon sa pamamagitan ng kanyang mga banal na propeta.

²²Katulad ng sinabi ni Moises, ‘Ang Panginoon na inyong Diyos ay magpapadala sa inyo ng isang propetang katulad ko mula sa lahi ninyo. Makinig kayo sa lahat ng sasabihin niya.

²³Ang taong hindi nakikinig sa sinasabi ng propetang ito ay tuluyang ihihiwalay sa bayan ng Diyos at lilipulin.’[#3:23 Deu. 18:15, 18, 19.]

²⁴“Ang lahat ng mga propeta – simula kay Samuel at ang mga sumunod sa kanya – ay nagpahayag din tungkol sa mga bagay na nangyayari ngayon.

²⁵Kayo ay mula sa lahi ng mga propeta, at kabilang kayo sa kasunduang ginawa ng Diyos sa inyong mga ninuno, noong sinabi niya kay Abraham, ‘Sa pamamagitan ng iyong lahi, pagpapalain ko ang lahat ng tao sa mundo.’[#3:25 Gen. 22:18; 26:4.]

²⁶Nang muling binuhay ng Diyos ang kanyang lingkod, sa inyo niya ito unang isinugo, upang pagpalain kayoʼt talikuran ninyo ang inyong masasamang pamumuhay.”[#3:26 : O pinili.]