Exodus 34

Ang Bagong Malalapad na Bato

¹Sinabi ng Panginoon kay Moises, “Tumapyas ka ng dalawang malalapad na bato gaya noong una, dahil susulatan ko ito ng mga salitang nakasulat sa naunang mga batong binasag mo.

²Maghanda ka bukas ng umaga, at umakyat ka sa Bundok ng Sinai. Makipagkita ka sa akin sa itaas ng Bundok.

³Kailangang walang sasáma sa iyo; walang sinumang makikita sa kahit saang bahagi ng bundok. Kahit na mga tupa o baka ay hindi maaaring manginain sa bundok.”

⁴Kaya tumapyas si Moises ng dalawang malalapad na bato gaya noong una. At kinabukasan, maaga paʼy umakyat na siya sa bundok ayon sa iniutos ng Panginoon dala ang dalawang malalapad na bato.

⁵Bumaba ang Panginoon sa pamamagitan ng ulap at binanggit niya ang kanyang pangalang Panginoon habang nakatayo si Moises sa presensya niya.

⁶Dumaan ang Panginoon sa harap ni Moises at sinabi, “Ako ang Panginoon , ang mahabagin at matulunging Diyos. Mapagmahal at matapat ako, at hindi madaling magalit.

⁷Ipinapakita ko ang pagmamahal ko sa maraming tao, at pinapatawad ko ang mga kasamaan nila, pagsuway at mga kasalanan. Ngunit pinaparusahan ko ang mga nagkakasala, pati na ang kanilang salinlahi hanggang sa ikatlo at ikaapat na henerasyon.”

⁸Nagpatirapa si Moises sa lupa at sumamba.

⁹Sinabi niya, “O Panginoon , kung nalulugod po kayo sa akin, nakikiusap po akong sumáma kayo sa amin. Kahit na matigas ang ulo ng mga taong ito, patawarin po ninyo kami sa aming kasamaan at mga kasalanan. Tanggapin po ninyo kami bilang inyong mga mamamayan.”

¹⁰Sinabi ng Panginoon , “Gagawa ako ng kasunduan sa inyo. Sa harap ng lahat ng iyong mga kababayan, gagawa ako ng mga kababalaghang hinding-hindi ko pa nagagawa sa kahit saang bansa sa buong mundo. Makikita ng mga mamamayan sa palibot ninyo ang mga bagay na gagawin ko sa pamamagitan mo.

¹¹Sundin mo ang iniuutos ko sa iyo sa araw na ito. Itataboy ko sa harap mo ang mga Amoreo, Cananeo, Heteo, Perezeo, Heveo at mga Jebuseo.

¹²Huwag kang gagawa ng kasunduan sa mga tao sa lupaing pupuntahan ninyo, dahil magiging bitag ito para sa inyo.

¹³Sa halip, gibain ninyo ang kanilang mga altar, durugin ang kanilang mga alaalang bato, at putulin ang kanilang mga posteng imahen ni Ashera.

¹⁴Hindi kayo dapat magkaroon ng ibang diyos maliban sa akin. Dahil ako, ang Panginoon , Mapanibugho ang pangalan ko at ayaw kong may kaagaw sa inyong pagsamba.

¹⁵“Huwag kayong gagawa ng kasunduan sa mga taong nakatira sa lupaing iyon, dahil kapag inimbitahan nila kayo sa kanilang pagsamba at paghahandog sa kanilang mga diyos, mahikayat pa nila kayong kumain ng kanilang mga handog.

¹⁶Baka mapangasawa ng mga anak nʼyo ang mga anak nila, na silang magtutulak sa kanila sa pagsamba sa ibang mga diyos.

¹⁷“Huwag kayong gagawa ng mga diyos-diyosan.

¹⁸“Ipagdiwang ninyo ang Pista ng Tinapay na Walang Pampaalsa. Ayon sa iniutos ko sa inyo, kumain kayo ng tinapay na walang pampaalsa sa loob ng pitong araw. Gawin ninyo ito sa itinakdang panahon sa buwan ng Abib, dahil iyon ang buwan nang lumabas kayo ng Ehipto.

¹⁹“Akin ang lahat ng panganay na lalaki, pati ang panganay na lalaki ng mga hayop ninyo, tupa man o baka.

²⁰Maaaring matubos ang panganay na lalaki ng mga asno nʼyo sa pamamagitan ng pagpapalit dito ng tupa. Ngunit kung hindi ito tutubusin, kailangang patayin ang asno sa pamamagitan ng pagbali sa leeg nito. Maaari rin ninyong matubos ang mga panganay ninyong lalaki.

“Walang makakalapit sa akin na walang dalang mga handog.

²¹“Magtrabaho kayo sa loob ng anim na araw, pero sa ikapitong araw ay magpahinga kayo, kahit sa panahon ng pag-aararo at pag-ani.

²²“Ipagdiwang ninyo ang Pista ng Pag-aani kung mag-aani kayo ng mga unang ani ng trigo, at ipagdiwang din ninyo ang Pista ng Katapusan ng Pag-ani sa katapusan ng taon.

²³“Tatlong beses sa isang taon, pupunta ang kalalakihan ninyo sa mga pistang ito sa pagsamba sa Makapangyarihang Panginoon , ang Diyos ng Israel.

²⁴Itataboy ko ang mga mamamayan sa lupaing ibibigay ko sa inyo, at palalawakin ko ang inyong teritoryo. At walang sasalakay o aagaw sa inyong bansa sa mga panahong humaharap kayo sa akin na Panginoon na inyong Diyos.

²⁵“Huwag kayong maghahandog ng dugo sa akin at kahit anong may pampaalsa. Huwag din kayong magtitira para sa susunod na araw ng karne ng tupa na handog ninyo sa panahon ng Pista ng Paglampas ng Anghel.

²⁶“Dalhin ninyo sa bahay ng Panginoon na inyong Diyos ang pinakamagandang bahagi ng una ninyong ani.

“Huwag ninyong lulutuin ang batang kambing na hindi pa naaawat sa kanyang ina.”

²⁷Sinabi ng Panginoon kay Moises, “Isulat mo itong sinasabi ko, dahil ito ang tuntunin ng kasunduan ko sa iyo at sa Israel.”

²⁸Naroon si Moises kasama ng Panginoon sa loob ng apatnapung araw at apatnapung gabi na wala siyang kinain at ininom. Isinulat niya sa malalapad na bato ang mga tuntunin ng kasunduan, ang Sampung Utos.

Ang Pagliwanag ng Mukha ni Moises

²⁹Nang bumaba si Moises sa Bundok ng Sinai, dala niya ang dalawang malalapad na bato kung saan nakasulat ang mga utos ng Diyos. Hindi niya alam na nakakasilaw ang mukha niya dahil sa pakikipag-usap niya sa Panginoon .

³⁰Nang makita ni Aaron at ng lahat ng mga Israelita ang nakakasilaw na mukha ni Moises, natakot silang lumapit sa kanya.

³¹Ngunit ipinatawag sila ni Moises, kaya lumapit sila Aaron at ang mga pinuno ng mamamayan ng Israel, at nakipag-usap si Moises sa kanila.

³²Pagkatapos, lumapit ang lahat ng mga Israelita sa kanya. At sinabi niya sa kanila ang lahat ng utos na ibinigay sa kanya ng Panginoon sa Bundok ng Sinai.

³³Matapos makipag-usap ni Moises sa kanila, tinalukbungan ni Moises ang kanyang mukha.

³⁴Ngunit sa tuwing papasok siya sa Toldang Tipanan upang makipag-usap sa Panginoon , tinatanggal niya ang talukbong hanggang sa makalabas siya ng Tolda. Kapag nakalabas na siya, sinasabi niya sa mga Israelita ang lahat ng sinabi ng Panginoon sa kanya,

³⁵at nakikita ng mga Israelita ang nakakasilaw niyang mukha. At tatalukbungan na naman ni Moises ang mukha niya hanggang sa bumalik siya sa Tolda upang makipag-usap sa Panginoon .