Exodus 37

Ang Paggawa ng Kahon ng Kasunduan

¹Ginawa nina Bezalel ang Kahon gamit ang kahoy ng akasya. May 45 pulgada ang haba ng Kahon, 27 pulgada ang lapad at taas nito.

²Binalutan ito ng purong ginto sa loob at labas, at nilagyan ng hinulmang ginto ang mga palibot nito.

³Ginawaan din nila ito ng apat na argolyang ginto at ikinabit sa apat na paa nito.

⁴Gumawa sila ng tukod na akasya na binalutan ng ginto.

⁵Ikinabit nila ang mga argolya sa bawat gilid ng Kahon upang mabuhat ang Kahon sa pamamagitan ng mga tukod.

⁶Ginawa rin niya ang takip ng kapatawaran gamit ang purong ginto, apatnapuʼt limang pulgada ang haba at dalawampuʼt pitong pulgada ang lapad.

⁷Gumawa rin siya ng dalawang gintong kerubin gamit ang pinanday na ginto, at inilagay sa bawat dulo ng takip.

⁸Inilagay niya ang isang kerubin sa isang dulo at ang isa naman sa kabilang dulo. Ginawa niya ang mga kerubin na kaisang piraso ng takip sa magkabilang dulo nito.

⁹Nakabukang paitaas ang mga pakpak ng mga kerubin na nakalukob sa takip. Magkaharap ang dalawang kerubin at nakatingin sa takip.

Ang Paggawa ng Mesa na Nilalagyan ng Tinapay

¹⁰Gumawa rin sila ng mesang akasya na tatlumpuʼt anim na pulgada ang haba, labingwalong pulgada ang lapad, at dalawampuʼt pitong pulgada ang taas.

¹¹Binalutan ito ng purong ginto at nilagyan ng hinulmang ginto ang palibot nito.

¹²Nilagyan din nila ng sinepa ang bawat gilid. Mga apat na pulgada ang lapad at nilagyan din nila ng hinulmang ginto ang sinepa.

¹³Pagkatapos, gumawa sila ng apat na argolyang ginto, at ikinabit ito sa apat na paa ng mesa,

¹⁴malapit sa sinepa. Dito nila isinuksok ang mga tukod na pambuhat sa mesa.

¹⁵Gawa sa akasya ang mga tukod na ito at nababalot ng ginto.

¹⁶Gumawa rin sila ng mga kagamitang purong ginto para sa mesa: pinggan, tasa, mangkok at banga na gagamitin para sa mga handog na inumin.

Ang Paggawa ng Ilawan

¹⁷Gumawa sila ng ilawang yari sa pinanday na purong ginto ang paa, katawan, at palamuting hugis bulaklak na ang ibaʼy buko pa lang at ang iba naman ay nakabuka na. Ang palamuti ay kasama nang ginawa nang gawin ang katawan nito.

¹⁸Ang ilawan ay may anim na sanga, tigtatatlo sa bawat gilid.

¹⁹Ang bawat sanga nito ay may tatlong palamuting hugis bulaklak ng almendra, na ang iba ay buko pa at ang iba naman ay nakabuka na.

²⁰Ang katawan ng ilawan ay may apat na palamuting hugis bulaklak ng almendra, na ang ibaʼy buko pa at ang iba naman ay nakabuka na.

²¹May isang hugis bulaklak sa ilalim ng bawat pares ng sanga na galing sa katawan nito, at lahat ay gawa sa isang piraso.

²²Ang mga palamuti at ang mga sanga ay kasama nang ginawa nang gawin ang katawan ng ilawan na gawa sa pinanday na purong ginto.

²³Gumawa rin sila ng pitong ilaw, mga panggupit ng mitsa nito, at mga pansahod sa upos ng mitsa ng ilaw. Purong ginto ang lahat ng ito.

²⁴Ang nagamit sa paggawa ng ilawan at ng lahat ng kagamitan nito ay tatlumpuʼt limang kilong purong ginto.

Ang Paggawa ng Altar na Pagsusunugan ng Insenso

²⁵Gumawa rin sila ng altar na akasya na pagsusunugan ng insenso. Kuwadrado ito, labingwalong pulgada ang haba at ang lapad, at tatlumpuʼt anim na pulgada ang taas. May parang sungay sa mga sulok nito na kaisang piraso ng altar.

²⁶Nilagyan nila ng purong ginto ang ibabaw nito, ang apat na gilid at ang parang sungay sa mga sulok at hinulmang ginto sa palibot.

²⁷Nilagyan nila ng dalawang argolyang ginto ang ilalim ng hinulmang ginto sa magkabilang gilid ng altar, upang pagsuksukan ng mga tukod na pambuhat dito.

²⁸Ang tukod ay gawa sa kahoy ng akasya at binalutan ng ginto.

²⁹Gumawa rin sila ng banal na langis na pamahid at purong insenso na napakabango.