Ezekiel 42

Ang mga Silid para sa mga Pari

¹Pagkatapos, dinala ako ng tao sa bakuran sa labas ng Templo. Doon kami dumaan sa hilagang daanan ng Templo. At doon ay ipinakita niya sa akin ang mga silid na nasa hilaga ng bakuran sa loob at ng gusali sa kanluran.

²Itong mga silid na nakaharap sa hilaga ay 175 talampakan ang haba at walumpuʼt walong talampakan ang luwang.

³May agwat na tatlumpuʼt limang talampakan sa pagitan ng Templo at ng mga silid na ito. Nakaharap ang mga silid na ito sa daanang bato sa bakuran sa labas. Itoʼy may tatlong palapag

⁴at sa harap nito ay may daanang labimpitong talampakan ang luwang at 175 talampakan ang haba. Ang mga pinto nito ay nakaharap sa gawing hilaga.

⁵Ang mga silid sa ikatlong palapag ay makipot kaysa sa pangalawang palapag, at ang mga silid sa ikalawang palapag ay mas makipot kaysa sa unang palapag dahil nangangailangan ng daanan ang mga palapag sa itaas.

⁶Ang tatlong palapag na ito ay walang haligi, di tulad ng mga nasa bakuran. At dahil magkakapatong ang mga ito, paliit nang paliit ang mga silid nito mula sa itaas pababa.

⁷Ang gusaling ito at ang bakuran sa labas ay may pagitang pader na walumpuʼt limang talampakan ang haba.

⁸Dahil kung wala ang pader na ito, ang kalahati ng gusali na walumpuʼt limang talampakan ay makikita sa bakuran sa labas. Ang kabuuan ng gusali na may habang 175 talampakan ay makikita sa Templo.

⁹May mga daanan papasok sa ibabang palapag ng gusaling ito kung galing ka sa bandang silangan ng bakuran sa labas.

¹⁰Mayroon ding mga silid sa bandang timog na pader ng bakuran sa loob. Ang mga silid na ito na nasa gilid ng bakuran sa loob ay malapit din sa gusali sa kanluran.[#42:10 : Ganito sa tekstong Septuagint. Sa tekstong Hebreo, silangan.]

¹¹May daanan din sa harap ng mga silid na ito, katulad ng mga silid sa gawing hilaga. Ang kanilang haba at luwang ay magkapareho, pati ang mga daanan at ang mga sukat nito ay magkapareho rin. Ang mga pintuan ng mga silid sa hilaga ay

¹²katulad din sa mga silid sa timog. May pintuan pagdating mismo sa daanan na papasok sa gusaling iyon. May pader sa gilid ng daanang ito, kung papasok ka galing silangan.

¹³Sinabi sa akin ng tao, “Ang mga silid na ito sa gawing timog at hilaga na nasa gilid ng bakuran sa loob ay mga banal na silid. Sapagkat diyan kumakain ang mga pari ng mga napakabanal na handog na inihandog nila sa Panginoon . Gagamitin din nila ang mga silid na ito bilang lalagyan ng mga handog ng pagpaparangal sa Panginoon : ang handog na pagkaing butil, handog para sa kasalanan at handog na pambayad ng kasalanan. Sapagkat napakabanal ng mga silid na ito.

¹⁴Kapag ang mga pari ay lumabas na sa mga banal na silid na ito, hindi sila dapat pumunta agad sa bakuran sa labas. Dapat magbihis muna sila ng ibang damit bago sila pumunta sa bahagi ng Templo na para sa mga tao.”[#42:14 : O Banal na Lugar o Templo.]

¹⁵Matapos sukatin ng tao ang loob ng Templo, dinala niya ako sa labas. Doon kami dumaan sa gawing silangan, at sinukat niya ang kabuuang luwang ng Templo.

¹⁶Sinukat niya ng kanyang panukat na kahoy ang gawing silangan, at ang sukat ng haba nito ay 875 talampakan.

^17-18-19Sinukat din niya ang sa gawing hilaga, kanluran at timog at pawang magkakatulad na 875 talampakan ang haba nito.

²⁰Kaya ang Templo ay parisukat. Napapalibutan ito ng pader upang ihiwalay ang mga banal na lugar mula sa mga lugar na pangkaraniwan.