Genesis 16

Si Hagar at si Ismael

¹Si Sarai na asawa ni Abram ay hindi magkaanak. Ngunit may alipin siyang babae na taga-Ehipto na ang pangalan ay Hagar.

²Kaya sinabi ni Sarai kay Abram, “Sapagkat hindi pinahintulutan ng Panginoon na akoʼy magkaanak, sumiping ka sa alipin kong babae, baka sakaling magkaroon tayo ng anak sa pamamagitan niya.”

Pumayag si Abram sa sinabi ng kanyang asawa.

³Kaya ibinigay ni Sarai ang kanyang Ehipsiyong alipin na si Hagar kay Abram upang maging asawa nito. (Nangyari ito matapos manirahan si Abram sa Canaan ng sampung taon.)

⁴Sumiping nga siya kay Hagar at itoʼy nagbuntis.

Nang malaman ni Hagar na buntis siya, hinamak niya si Sarai, ang kanyang amo.

⁵Dahil dito, sinabi ni Sarai kay Abram, “Ikaw ang dapat sisihin sa pang-aalipusta ni Hagar sa akin. Ibinigay ko siya sa iyo ngunit ngayong buntis na si Hagar hinahamak na niya ako. Ang Panginoon na ang humatol kung sino sa atin ang tama.”

⁶Sumagot si Abram, “Kung ganoon, ibabalik ko siya sa iyo bilang alipin mo at bahala ka kung ano ang gusto mong gawin sa kanya.” Simula noon, hindi naging maganda ang pakikitungo ni Sarai kay Hagar, kaya tumakas na lamang ito.

⁷Nakita si Hagar ng anghel ng Panginoon doon sa bukal ng tubig sa ilang. Ang bukal na ito ay malapit sa daan na papuntang Shur.

⁸Tinanong siya ng anghel, “Hagar, alipin ni Sarai, saan ka ba nanggaling at saan ka pupunta?”

Sumagot siya, “Tumakas po ako sa amo kong si Sarai.”

⁹Sinabi ng anghel ng Panginoon sa kanya, “Bumalik ka sa amo mo at magpakumbaba ka sa kanya.”

¹⁰Pagkatapos, sinabi pa ng anghel, “Pararamihin ko ang lahi mo, at ang dami nilaʼy hindi mabibilang.”

¹¹At sinabi pa ng anghel ng Panginoon sa kanya,

“Nagdadalantao ka ngayon

at magsisilang ka ng lalaki.

Pangangalanan mo siyang Ismael,

sapagkat narinig ng Panginoon

ang iyong pagdaing.

¹²Ngunit ang anak mo ay mabubuhay

tulad ng isang asnong-gubat.

Kakalabanin niya ang lahat,

at ang lahat ay lalaban sa kanya.

Kahit ang mga kamag-anak niya

ay kakalabanin sa kanya.”

¹³Tinawag ni Hagar na “Diyos na Nakakakita” ang pangalan ng Panginoon na nakipag-usap sa kanya, sapagkat sinabi niya, “Tunay bang nakita ko ang Diyos na nakakakita sa akin sa lugar na ito?”

¹⁴Iyon ang bukal na naroon sa gitna ng Kades at Bered na tinatawag na Beer-lahai-roi.[#16:14 : Ang ibig sabihin, Balon ng buháy na Diyos na nakakakita sa akin.]

¹⁵At nagsilang si Hagar ng isang anak na lalaki kay Abram. Pinangalanan niya ang kanyang anak ng Ismael.

¹⁶Si Abram ay walumpuʼt anim na taóng gulang nang ipinanganak ni Hagar si Ismael.