Genesis 25

Ang Pagkamatay ni Abraham

¹Nag-asawa ulit si Abraham, at ang pangalan ng asawa niya ay Ketura.

²Ang mga anak nila ay sina Zimran, Jocsan, Medan, Midian, Isbak at Suah.

³Si Jocsan ang ama nina Seba at Dedan. Ang mga lahi ni Dedan ay ang mga Asurim, Letusim, at Leumim.

⁴Ang mga anak na lalaki ni Midian ay sina Efa, Efer, Enoc, Abida at Eldaa. Silang lahat ang mga lahi ni Ketura.

⁵Iniwang lahat ni Abraham ang kanyang ari-arian kay Isaac.

⁶Ngunit habang buhay pa siya, binigyan niya ng mga regalo ang iba niyang mga anak sa iba niyang mga asawa, at pinapunta sa silangan upang ihiwalay sa anak niyang si Isaac.

⁷Nabuhay si Abraham ng 175 taon.

⁸Matapos mamuhay ng isang mahaba at matiwasay na buhay, nalagot ang kanyang hininga at inilibing siya kasama ng kanyang mga kamag-anak na sumakabilang buhay na.

⁹Inilibing siya ng mga anak niyang sina Isaac at Ismael doon sa kuweba ng Macpela, sa silangan ng Mamre, sa bukid na dating pagmamay-ari ni Efron na anak ni Zohar na Heteo.

¹⁰Ang bukid na iyon ay binili ni Abraham sa harapan ng mga Heteo. Doon inilibing si Abraham at ang asawa niyang si Sara.

¹¹Pagkatapos mamatay ni Abraham, binasbasan ng Diyos si Isaac at doon siya nanirahan sa Beer-lahai-roi.

Ang mga Lahi ni Ismael

¹²Ito ang salaysay tungkol sa pamilya ni Ismael na anak ni Abraham kay Hagar na Ehipsiyo, na alipin ni Sara.

Si Nebayot ang panganay ni Ismael,

sumunod sina Kedar, Adbeel, Mibsam,

¹⁴Misma, Duma, Massa,

¹⁵Hadad, Tema, Jetur,

Nafis at Kedema.

¹⁷Nabuhay si Ismael ng 137 taon. Namatay siya at kasama na ng kanyang mga kamag-anak na sumakabilang buhay na.

¹⁸Tumira ang mga angkan niya sa mga lugar na galing sa Havila hanggang sa Shur, sa silangan ng Ehipto na papunta sa Asiria. Kinalaban nila ang lahat ng kamag-anak nila na mga lahi ni Isaac.

Ipinanganak sina Esau at Jacob

¹⁹Ito ang salaysay tungkol sa pamilya ni Isaac na anak ni Abraham.

Si Abraham ang ama ni Isaac.

²⁰Si Isaac ay apatnapung taóng gulang nang napangasawa niya si Rebeca na anak ni Betuel na Arameo na taga-Padan-aram. Si Rebeca ay kapatid ni Laban na Arameo rin.[#25:20 : Isang lugar sa Mesopotamia.]

²¹Ipinanalangin ni Isaac sa Panginoon ang kanyang asawa dahil baog siya. Tinugon ng Panginoon ang dalangin niya, kaya nagbuntis si Rebeca.

²²Naramdaman niya na nagtutulakan ang kambal na sanggol sa loob ng kanyang tiyan. Sinabi ni Rebeca, “Kung ganyan lang ang mangyayari sa kanila pagdating ng panahon mabuti pang mamatay na lang ako.” Kaya nagtanong siya sa Panginoon tungkol dito.

²³Sinabi ng Panginoon sa kanya,

“Dalawang bansa ang nasa iyong sinapupunan;

ang dalawang bayan na nasa loob mo ay magkalaban.

Ang isaʼy magiging makapangyarihan kaysa sa isa.

Ang nakatatanda ay maglilingkod sa nakababata niyang kapatid.”

²⁴Nang nanganak na si Rebeca, kambal ang anak niya.

²⁵Ang unang lumabas ay mapula-pula at balbon, kaya pinangalanan nila siyang Esau.

²⁶Nang lumabas ang ikalawa, ang kamay niya ay nakahawak sa sakong ng kanyang kakambal, kaya pinangalanan nila siyang Jacob. Si Isaac ay animnapung taóng gulang nang ipanganak ni Rebeca ang kambal.[#25:26 : Maaaring ang ibig sabihin, hinahawakan niya ang sakong o manloloko siya.]

Ibinenta ni Esau ang Kanyang Karapatan bilang Panganay

²⁷Nang lumaki na ang dalawang sanggol, naging mahusay na mangangaso si Esau at palagi lang siya sa bukid, habang si Jacob naman ay tahimik na tao at palaging nasa loob ng mga tolda.

²⁸Mas nagustuhan ni Isaac si Esau dahil mahilig siyang kumain ng mga ipinangaso ni Esau, ngunit si Jacob naman ay mas nagustuhan ni Rebeca.

²⁹Isang araw, habang nagluluto si Jacob ng sabaw, dumating si Esau galing sa pangangaso na gutom na gutom.

³⁰Sinabi niya kay Jacob, “Pakiusap, bigyan mo nga ako ng niluluto mong mapula-pulang sabaw dahil gutom na gutom na ako.” (Kaya tinatawag din si Esau na Edom.)[#25:30 : Ang ibig sabihin, pula.]

³¹Ngunit sumagot si Jacob, “Bibigyan kita nito kung ibibigay mo sa akin ang karapatan mo bilang panganay.”

³²Sinabi ni Esau, “Sige, ano baʼng gagawin ko sa karapatan na iyan kung mamamatay din lang ako sa gutom.”

³³Sumagot si Jacob, “Kung ganoon, sumumpa ka muna sa akin.” Kaya sumumpa si Esau na mapupunta kay Jacob ang karapatan niya bilang panganay.

³⁴Binigyan agad siya ni Jacob ng tinapay at nilagang bitsuwelas. Pagkatapos niyang kumain at uminom, umalis siya agad.

Dahil sa ginawang iyon ni Esau, binalewala niya ang karapatan niya bilang panganay.