Isaias 35

Ang Kaligayahan ng mga Iniligtas

¹Ang disyerto at ang tuyong lupa

ay matutuwa na

sa mga araw na iyon;

ang ilang ay magagalak

at mamumukadkad.

Katulad ng mga halaman sa tagsibol,

²aawit at sisigaw ito sa tuwa,

at mamumukadkad

ang maraming bulaklak nito.

Magiging maganda ito

katulad ng Bundok ng Lebanon,

at mamumunga ito nang sagana

katulad ng kapatagan ng Carmel at Saron.

At mahahayag dito ang kapangyarihan

at kadakilaan ng Panginoon

na ating Diyos.

³Kaya palakasin ninyo

ang mga nanghihina.

⁴Sabihin ninyo sa mga natatakot,

“Huwag kayong matakot.

Lakasan ninyo ang inyong loob.

Darating ang inyong Diyos

para maghiganti sa inyong mga kaaway,

at ililigtas niya kayo.”

⁵At kapag nangyari na ito,

makakakita na ang mga bulag

at makakarinig na ang mga bingi.

⁶Lulundag ang mga pilay

na parang usa

at sisigaw sa tuwa ang mga pipi.

Aagos ang tubig sa disyerto

at dadaloy ang tubig sa mga sapa sa ilang.

⁷Ang mainit na buhanginan

ay magiging tubigan.

At sa tigang na lupain

ay bubukal ang tubig.

Tutubo ang sari-saring damo

sa lugar na tinitirhan noon

ng mga asong-gubat.

⁸Magkakaroon ng maluwang

na lansangan sa ilang

at iyon ay tatawaging,

“Banal na Lansangan.”

Walang makasalanan o hangal

na makakadaan doon,

kundi ang mga sumusunod lamang

sa pamamaraan ng Panginoon .

⁹Walang leon

o anumang mababangis

na hayop ang makakadaan doon

kundi ang mga tinubos lamang

ng Panginoon .

¹⁰Ang mga tinubos ng Panginoon

ay magbabalik.

Papasok sila sa Zion na umaawit;

ang wagas na kagalakaʼy

korona sa kanilang mga ulo.

Ang kagalakan at kaligayahaʼy

kanilang makakamtan,

at ang kalungkutan at panghihinayang

ay mawawala nang tuluyan.