Isaias 41

Ang Pagtulong ng Diyos ang Israel

¹“Kayong mga nasa baybayin,

tumahimik kayo at makinig sa akin.

Kumuha kayo ng panibagong lakas,

kayong mga bansa.

Lumapit kayo sa akin

at kayoʼy magsalita.

Magtipon-tipon tayo

at hatulan natin ito.

²Sino ang nagpadala ng isang tao

mula sa silangan

at nagbigay sa kanya ng tagumpay

sa pakikipaglaban,

saan man siya pumunta?

Sino ang nagpasakop sa kanya

ng mga hari at mga bansa?

Winasak niya ang mga bansa at pinatay

ang mga hari nito sa pamamagitan

ng espada at pana.

At ang mga itoʼy naging

parang mga alikabok

na tinangay ng hangin.

³Hinabol niya sila

at walang humarang sa kanya

kahit sa mga lugar na

hindi pa niya napupuntahan.

⁴Sino ang gumawa ng lahat ng ito?

Sino ang nagpanukala

ng lahat ng mga mangyayari

mula pa noong unang henerasyon?

Hindi baʼt ako?

Akong Panginoon ay naroon

noong sinimulan ang mundo,

at naroroon din ako

hanggang sa katapusan nito.

⁵“Nakita ng mga tao sa malalayong lugar

ang aking mga gawa,

at nanginig sila sa takot.

Nagtipon sila,

⁶at ang bawat isa

ay nagtulungan at nagpalakas sa isaʼt isa.

⁷Ang mga karpintero, platero,

at ang iba pang mga manggagawa

na gumagawa ng mga diyos-diyosan

ay nagpalakas sa isaʼt isa na nagsasabi,

‘Maganda ang pagkakagawa natin.’

Pagkatapos, ipinako nila

ang ginawa nilang rebulto

sa lalagyan nito

para hindi ito mabuwal.

⁸“Ngunit ikaw, Israel, na aking lingkod

at ikaw, Jacob, na pinili ko,

mula sa lahi ni Abraham

na aking kaibigan,

⁹tinawag kita at kinuha

mula sa pinakamalayong

dako ng mundo.

Sinabi ko, ‘Ikaw ay aking lingkod.’

Pinili kita at hindi itinakwil.

¹⁰Huwag kang mangamba,

sapagkat kasama mo ako;

huwag kang malungkot,

sapagkat ako ang iyong Diyos.

Palalakasin kita at tutulungan.

Aalalayan kita sa pamamagitan

ng kamay kong nagliligtas.

¹¹“Ang lahat ng nagagalit sa iyo

ay tiyak na mapapahiya nang husto.

Ang mga lumalaban sa iyo

ay mapapahamak at maglalaho.

¹²At kahit hanapin mo

ang iyong mga kaaway

hindi mo na sila matatagpuan.

Silang mga kumakalaban sa iyo

ay magiging walang kabuluhan.

¹³Sapagkat ako ang Panginoon na iyong Diyos.

Ako ang nagpapalakas sa iyo

at nagsasabing huwag kang matatakot

dahil tutulungan kita.

¹⁴Kahit na maliit ka at mahina,[#41:14 : Sa literal, parang uod.]

huwag kang matatakot

dahil ako mismo ang tutulong sa iyo,”

sabi ng Panginoon ,

ang iyong Tagapagligtas,

ang Nag-iisang Banal ng Israel.

¹⁵“Makinig ka! Gagawin kitang

parang bagong panggiik,

matalim at maraming ngipin.

Gigiikin mo at dudurugin

ang mga bundok at burol.

Gagawin mo ito na parang ipa.

¹⁶Tatahipan mo sila

at tatangayin sila ng hangin;

ikakalat sila ng malakas na hangin.

Ngunit ikaw ay magagalak sa Panginoon ;

magpupuri ka sa Banal na Diyos ng Israel.

¹⁷“Kapag nangangailangan ng tubig

ang mga mamamayan kong dukha,

at wala silang matagpuan,

at kapag natutuyo na

ang mga lalamunan nila sa uhaw,

akong Panginoon

ang tutulong sa kanila.

Ako na Diyos ng Israel

ay hindi magpapabaya sa kanila.

¹⁸Paaagusin ko ang tubig sa batis,

dadaloy ito sa mga tuyong burol

at magkakaroon ng mga bukal

sa mga lambak.

Gagawin kong tubigan ang ilang

at ang mga lupang tigang

ay magkakaroon ng mga bukal.

¹⁹Patutubuin ko sa ilang

ang mga puno ng sedro, akasya, mirto,

olibo, pino, enebro, at sipres,

²⁰upang makita, malaman,

at maunawaan ng mga tao

na ang lumikha nito ay ako, ang Panginoon ,

ang Banal na Diyos ng Israel.”

²¹Sinabi ng Panginoon ,

ang Hari ng Israel, sa mga diyos-diyosan,

“Sige, magreklamo kayo

at mangatuwiran!

²²Lumapit kayo

at sabihin sa amin

kung ano ang mga mangyayari

sa hinaharap.

Sabihin ninyo sa amin

ang inyong mga sinabi noon

na mangyayari

para malaman namin

kung nangyari nga ito.

²³Sabihin ninyo sa amin kung ano

ang mangyayari sa hinaharap

para malaman namin na kayo ngaʼy mga diyos.

Gumawa kayo ng mabuti

o ng masama

para kami ay magtaka

at matakot sa inyo.

²⁴Ngunit ang totoo, wala kayong silbi

at wala kayong magagawa.

Kasuklam-suklam ang mga

taong pumili sa inyo

para kayo ay sambahin.

²⁵Pinili ko ang taong

mula sa hilaga para mamahala.

Dumudulog siya sa akin,

at ngayon ay darating siya

mula sa silangan.

Wawasakin niya ang mga namamahala

katulad ng pagyapak

ng magpapalayok sa putik

na gagawin niyang palayok.

²⁶Sino sa inyo ang nakahula

noong una pa na mangyayari ito

para malaman namin

at nang masabi naming tama siya?

Ni isa man lang sa inyoʼy walang nagsabi,

at walang nakarinig

na mayroon kayong sinabi.

²⁷Ako ang nagsabi nito noon sa Zion,

ang lungsod ng Jerusalem.

Nagpadala ako ng isang mensahero

para ibalita ang magandang balita

na nariyan na ang tutulong

sa kanila.

²⁸Wala akong nakita kahit tumingin ako.

Wala sa mga diyos-diyosan

ang makapagpapayo.

Ni isa sa kanilaʼy hindi makasagot

sa aking mga tanong.

²⁹Lahat ng mga diyos-diyosan

ay walang kabuluhan,

at walang magagawang anuman.

Para silang lalagyan

na puro hangin ang laman.”