Isaias 8

Ang Nalalapit na Pananakop ng Asiria

¹Sinabi ng Panginoon sa akin, “Kumuha ka ng isang malapad na tablang sulatan, at isulat mo ang mga katagang ito gamit ang ordinaryong panulat: ‘Maher-salal-has-baz.’ ”[#8:1 : Ang ibig sabihin, Mabilis sa pagsamsam, matulin sa paghakot.]

²Kumuha ako ng dalawang mapagkakatiwalaang saksi na magpapatunay na isinulat ko nga ito. Sila ay sina Urias na pari, at Zacarias na anak ni Jeberequias.

³Pagkatapos, sumiping ako sa aking asawa. Hindi nagtagal, naglihi siya at nanganak ng lalaki. Sinabi ng Panginoon sa akin, “Pangalanan mo siyang Maher-salal-has-baz.

⁴Bago matutong magsalita ang bata ng ‘Tatay’ o ‘Nanay,’ ang kayamanan ng Damasco at ang mga sinamsam ng Samaria ay kukunin ng hari ng Asiria.”

⁵Sinabi pa ng Panginoon sa akin,

⁶“Dahil sa tinanggihan

ng mga taong ito

ang tubig ng Siloa

na umaagos nang banayad,

at natutuwa sila kay Haring Rezin

at Haring Peka,

⁷ipapasalakay ko sila sa hari ng Asiria

at ng kanyang hukbo;

siya ay katulad ng malakas

na Ilog ng Eufrates

na bumabaha at umaapaw

sa kanyang mga pampang.

⁸Parang baha siyang raragasa sa Juda,

at aagos dito,

dadaan siyang parang tubig,

aabot hanggang leeg.

Parang nakabuka ang kanyang pakpak

na tatakip sa buong lupain.

Ngunit kasama natin ang Diyos!”

⁹Kayong mga bansa,

kahit na magsama-sama kayo,

magkakawatak-watak pa rin kayo.

Makinig kayong mga nasa malayo!

Kahit na maghanda pa kayo

sa pakikipagdigma,

matatalo pa rin kayo.

¹⁰Anuman ang binabalak ninyo laban sa amin

ay hindi magtatagumpay,

dahil kasama namin ang Diyos.

¹¹Mariin akong binalaan ng Panginoon na huwag kong gagayahin ang pamamaraan ng mga kababayan ko.

¹²“Huwag kayong makikipag-isa

sa ibang mga bansa

katulad ng ginagawa ng iba.

Huwag kayong matatakot

sa kinakatakutan nila,

at huwag kayong kakabahan.

¹³Ako, ang Panginoon ng mga Hukbo,

ay dapat ninyong kilalaning banal.

Ako ang dapat ninyong katakutan.

¹⁴Ako ang magiging kanlungan ninyo.

Ngunit sa mga taga-Israel at taga-Juda,

katulad ako ng isang batong

naging katitisuran sa mga tao,

at nakakapagpadapa sa kanila.

At para sa mga taga-Jerusalem,

para akong isang bitag.

¹⁵Marami sa kanila ang matitisod,

madadapa at mapapahamak.

Masisilo sila at mahuhuli.”

¹⁶Kayong mga tagasunod ko,

ingatan ninyo ang mga aral ko.

¹⁷Magtitiwala ako sa Panginoon

kahit na tinalikuran niya

ang lahi ni Jacob.

Sa kanya ako aasa.

¹⁸Ako at ang mga anak ko na ibinigay ng Panginoon ay mga palatandaan para sa Israel mula sa Panginoon ng mga Hukbo na nakatira sa Bundok ng Zion.[#8:18 : Ang ibig sabihin ay may kahulugan ang kanilang mga pangalan para sa Israel.]

Ang Kadilimaʼy naging Liwanag

¹⁹May mga nagsasabing humingi kayo ng patnubay mula sa mga kaluluwa ng mga patay at mga manghuhulang bumubulong-bulong. Hindi nga ba dapat humingi ang mga tao ng patnubay sa kanilang mga diyos? O kayaʼy humingi ng patnubay mula sa mga patay para sa mga buháy?

²⁰Ang kautusan at babalang patotoo ng Diyos ang dapat ninyong hingan ng patnubay. Kapag may mga nagsasabi ng mga bagay na salungat sa salita niya, nasa kadiliman pa rin sila.

²¹Lalakad sila na pagod at gutom. At dahil sa gutom, magagalit sila at susumpain ang hari nila at ang kanilang Diyos. Tumingala man sila sa langit

²²o tumingin sa lupa wala silang makikita kundi kahirapan at kadiliman. At doon sila dadalhin sa matinding kadiliman.