Jeremias 12

Ang mga Reklamo ni Jeremias

¹Panginoon , palaging makatarungan ang inyong tugon,

sa tuwing akoʼy dumaraing.

Ngunit ngayon, ako ay may tanong

tungkol sa inyong katarungan:

Bakit po umuunlad ang masasamang tao?

Bakit po mapayapa ang buhay

ng mga taong taksil sa inyo?

²Pinagpapala ninyo sila

tulad ng punongkahoy na nag-uugat, lumalago, at namumunga.

Pinupuri nila kayo sa kanilang mga bibig

ngunit hindi ito galing sa kanilang puso.

³Ngunit kilala ninyo ako Panginoon .

Nakikita ninyo ang aking mga ginagawa

at alam ninyo kung ano

ang nasa puso ko.

Kaladkarin ninyo ang mga taong ito

na tulad ng mga tupa

patungo sa katayan.

Ibukod po ninyo sila upang katayin.

⁴Hanggang kailan po kaya

ang pagkatuyo ng lupa

at ang pagkalanta ng mga damo?

Namamatay na po ang mga hayop

at mga ibon

dahil sa kasamaan ng mga tao sa lupaing ito.

Sapagkat sinasabi pa nila,

“Walang pakialam ang Diyos

sa sasapitin natin.”

Ang Tugon ng Panginoon

⁵Sinabi ng Panginoon ,

“Jeremias, kung napapagod ka

sa pakikipaghabulan sa mga tao,

di lalo na sa mga kabayo?

Kung nadadapa ka sa lugar na patag,

di lalo na sa kagubatang

malapit sa Ilog Jordan?

⁶Kahit na ang iyong mga kapatid

at kamag-anak ay nagtaksil sa iyo.

Nagbalak sila ng masama laban sa iyo.

Huwag kang magtiwala sa kanila

kahit na mabuti ang sinasabi nila.

⁷“Itatakwil ko ang mga mamamayan ko, ang bansang pag-aari ko.

Ibibigay ko ang minamahal ko,

ang aking mga mamamayan,

sa kanilang mga kaaway.

⁸Lumaban sila sa akin

na parang leon

na umaatungal sa kagubatan,

kaya akoʼy nagalit sa kanila.

⁹Naging kasuklam-suklam sila sa akin

na parang ibong mandaragit.

At sila mismoʼy napapalibutan

ng mga ibong mandaragit.

Titipunin ko ang mababangis na hayop

upang kainin sila nito.

¹⁰Wawasakin ng maraming pinuno ang Juda

na itinuturing kong aking ubasan.

Tatapak-tapakan nila itong

magandang lupain at gagawing ilang.

¹¹Gagawin nila itong malungkot na lugar

at magiging walang kabuluhan sa akin.

Magiging ilang ang lupaing ito,

dahil wala nang magmamalasakit dito.

¹²Darating ang mga mangwawasak

sa lugar na ilang.

Gagamitin sila Panginoon

bilang espada

na wawasak sa buong lupain,

at walang makakatakas.

¹³Magtatanim ng trigo ang mga mamamayan ko,

ngunit aani sila ng tinik.

Magtatrabaho sila nang husto

pero wala silang pakikinabangan.

Mag-aani sila ng kahihiyan

dahil sa matinding galit

ng Panginoon .”

¹⁴Sinabi pa ng Panginoon , “Ito ang gagawin ko sa lahat ng masasamang bansa sa palibot ng Israel na sumira ng lupaing ibinigay ko sa mga mamamayan ko: Palalayasin ko sila sa lupain nila katulad ng pagpapalayas ko sa mga taga-Juda sa lupain nito.

¹⁵Ngunit sa bandang huli, kahahabagan ko ulit ang mga bansang ito at ibabalik ko sila sa sarili nilang lupain.

¹⁶At kung tatanggapin nila nang buong puso ang pananampalataya ng mga mamamayan ko at kung susumpa sila sa pangalan ko, na nagsasabing, ‘Habang buháy ang Panginoon ,’ gaya ng itinuro nila sa mga mamamayan ko na pagsumpa sa pangalan ni Baal, magiging kabilang din sila sa mga mamamayan ko.

¹⁷Ngunit ang alinmang bansa na hindi susunod sa akin ay palalayasin ko sa kanilang lupain at lilipulin,” sabi ng Panginoon .