Jeremias 21

Hinulaan ang Pagbagsak ng Jerusalem

¹Ngayon, nagsalita ang Panginoon kay Jeremias nang sinugo ni Haring Zedequias si Pashur na anak ni Malquias at ang paring si Zefanias na anak ni Maaseya. Sinabi nila,

²“Ipakiusap mo sa Panginoon na tulungan kami, dahil sinasalakay na kami ni Haring Nebucadnezar ng Babilonia. Baka sakaling gumawa ng himala ang Panginoon katulad ng ginawa niya noon, upang mapigilan ang pagsalakay ni Nebucadnezar.”

³Ngunit sinagot sila ni Jeremias,

⁴“Sabihin ninyo kay Zedequias na ito ang sinasabi ng Panginoon , ang Diyos ng Israel, ‘Magiging walang kabuluhan ang mga sandata na inyong ginagamit sa pakikipagdigma ninyo sa hari ng Babilonia at sa mga kawal niya na nakapaligid na sa inyo. Titipunin ko sila sa gitna ng lungsod na ito.[#21:4 : Sa literal, mga Caldeo. Ganito rin sa talata 9|JER 21:9.; #21:4 : O ang mga sandata ninyo.]

⁵Ako mismo ang makikipaglaban sa inyo sa pamamagitan ng kapangyarihan ko dahil sa matindi kong galit.

⁶Papatayin ko ang lahat ng naninirahan sa lungsod na ito, tao man o hayop. Mamamatay sila sa matinding salot.

⁷At ikaw, Haring Zedequias ng Juda, ang mga tagapamahala mo, at ang mga mamamayang natitira sa lungsod na ito na hindi namatay sa salot, digmaan, o gutom ay ibibigay ko kay Haring Nebucadnezar ng Babilonia na kaaway ninyo. At walang awa niya kayong papatayin,’ ” sabi ng Panginoon .

⁸“Sabihin din ninyo sa mga mamamayan ng Jerusalem na ito ang ipinasasabi ng Panginoon : ‘Makinig kayo! Pumili kayo, buhay o kamatayan.

⁹Ang sinumang mananatili sa lungsod na ito ay mamamatay sa digmaan, gutom o sakit. Ngunit ang mga susuko sa mga taga-Babilonia na nakapalibot sa lungsod ninyo ay mabubuhay.

¹⁰Nakapagpasya na akong padalhan ng kapahamakan ang lungsod na ito at hindi kabutihan. Ipapasakop ko ito sa hari ng Babilonia, at susunugin niya ito,’ ” sabi ng Panginoon .

¹¹“Sabihin din ninyo sa sambahayan ng hari ng Juda na pakinggan ang mensahe ng Panginoon .

¹²Ito ang sinasabi ng Panginoon sa iyo, angkan ni David:

‘Pairalin ninyo palagi ang katarungan.

Tulungan ninyo ang mga ninakawan;

iligtas ninyo sila sa mga umaapi sa kanila.

Sapagkat kung hindi, magniningas ang aking galit

na parang apoy na hindi mapapatay

dahil sa masama ninyong ginawa.

¹³Kalaban ko kayo, mga taga-Jerusalem,

kayong nakatira sa ibabaw ng lambak,

sa mabatong talampas,

sabi ng Panginoon .

Sabi ninyo, “Walang makakasalakay sa atin.

Walang makakapasok sa kanlungan nating ito!”

¹⁴Ngunit parurusahan ko kayo

ayon sa mga ginagawa ninyo.

Susunugin ko ang inyong mga kagubatan

hanggang sa ang lahat ng nakapalibot sa inyo ay matupok,’ ” wika ng Panginoon .