Jeremias 27

Naglagay ng Pamatok sa Leeg si Jeremias

^1-2Noong pasimula ng paghahari ni Zedequias na anak ni Haring Josias ng Juda, sinabi sa akin ng Panginoon , “Jeremias, gumawa ka ng pamatok at lagyan mo ng tali at ilagay mo sa batok mo.

³Pagkatapos, sabihin mo ito sa mga hari ng Edom, Moab, Amon, Tiro at Sidon sa pamamagitan ng mga sugo nila na nasa Jerusalem upang makipagkita kay Haring Zedequias ng Juda.

⁴Sabihin mo sa kanila ang mensaheng ito para sa kanilang mga hari: Ito ang sinasabi ng Panginoon ng mga Hukbo, ang Diyos ng Israel,

⁵‘Sa pamamagitan ng kapangyarihan ko nilikha ko ang mundo, ang mga tao at mga hayop, at nasa sa akin kung sino ang gusto kong gawing tagapamahala nito.

⁶Kaya ngayon, ibibigay ko ang mga bansa nʼyo sa lingkod kong si Haring Nebucadnezar ng Babilonia. Pati ang mababangis na hayop ay ipapasakop ko sa pamamahala niya.

⁷Ang lahat ng bansa ay maglilingkod sa kanya, sa anak, at sa apo niya hanggang sa panahong bumagsak ang kaharian ng Babilonia. At ang Babilonia naman ang maglilingkod sa maraming bansa at sa mga makapangyarihang hari.

⁸“ ‘Ngunit kung may bansa o kahariang ayaw maglingkod o magpaalipin kay Haring Nebucadnezar ng Babilonia, ako ang magpaparusa sa bansang iyon sa pamamagitan ng digmaan, gutom, at sakit hanggang sa tuluyang maipasakop ko sila kay Nebucadnezar. Ako, ang Panginoon , ang nagsasabi nito.

⁹Kaya huwag kayong maniniwala sa inyong mga propeta, mga manghuhula, mga nagpapaliwanag tungkol sa mga panaginip, mga mangkukulam o mga espiritistang nagsasabing maglilingkod kayo sa hari ng Babilonia.

¹⁰Kasinungalingan ang sinasabi nila sa inyo. At kung maniniwala kayo sa kanila, paaalisin ko kayo sa lupain ninyo. Palalayasin at lilipulin ko kayo.

¹¹Ngunit ang mga bansang magpapasakop at maglilingkod sa hari ng Babilonia ay mananatili sa sarili nilang bayan. Dito sila maninirahan at bubungkalin nila ang kanilang sariling lupain, sabi ng Panginoon .’ ”

¹²Ito rin ang sinabi ko kay Haring Zedequias ng Juda. Sinabi ko, “Magpasakop kayo sa hari ng Babilonia. Maglingkod kayo sa kanya at sa mga mamamayan niya at mabubuhay kayo.

¹³Sapagkat kung hindi, mamamatay kayo at ang mga mamamayan nʼyo sa digmaan, gutom at sakit gaya ng sinabi ng Panginoon na mangyayari sa mga bansang hindi maglilingkod sa hari ng Babilonia.

¹⁴Huwag kayong maniwala sa sinasabi ng mga propeta na maglilingkod kayo sa hari ng Babilonia, dahil kasinungalingan ang sinasabi nila sa inyo.

¹⁵Ito ang sinasabi ng Panginoon , ‘Hindi ko sinugo ang mga propetang iyan. Nagsasalita sila ng kasinungalingan sa pangalan ko. Kaya kung maniniwala kayo sa kanila, palalayasin ko kayo at lilipulin pati ang mga propetang iyan.’ ”

¹⁶Pagkatapos, sinabi ko sa mga pari at sa lahat ng tao, “Sinabi ng Panginoon na huwag kayong maniniwala sa mga propetang nagsasabing malapit nang ibalik ang mga kagamitan ng templo mula sa Babilonia. Kasinungalingan iyan.

¹⁷Huwag kayong maniniwala sa kanila; maglingkod kayo sa hari ng Babilonia at nang mabuhay kayo, kinakailangan pa bang mawasak ang lungsod na ito?

¹⁸Kung talagang mga propeta sila at galing sa Panginoon ang sinasabi nila, manalangin sila sa Panginoon ng mga Hukbo na ang mga kagamitang naiwan sa templo, sa palasyo ng hari ng Juda at sa Jerusalem ay huwag nang dalhin sa Babilonia.

¹⁹Sapagkat sinasabi ng Panginoon ng mga Hukbo na ang mga tansong haligi ng templo, ang lalagyan ng tubig na tinatawag na Dagat, mga karwahe, at ang iba pang mga kagamitan sa lungsod na ito ay dadalhin sa Babilonia.

²⁰Ang mga nasabing kagamitan ay hindi dinala ni Haring Nebucadnezar sa Babilonia noong binihag niya si Haring Jehoyakin na anak ni Haring Jehoiakim ng Juda, kasama ng mga maharlika ng Juda at Jerusalem.

²¹Ito ang sinabi ng Panginoong Diyos ng mga Hukbo, ang Diyos ng Israel, tungkol sa mga bagay na naiwan sa Templo Panginoon at sa palasyo ng hari ng Juda at sa Jerusalem:

²²‘Dadalhin sa Babilonia ang mga kagamitang ito at mananatili roon,’ sabi ng Panginoon . ‘At kukunin ko ang mga ito at ibabalik sa Jerusalem.’ ”