Jeremias 49

Ang Mensahe Tungkol sa Amon

¹Ito naman ang sinabi ng Panginoon tungkol sa mga Amonita:

“Wala bang lahi si Israel

na magmamana ng lupaing ito?

Kayong mga sumasamba

sa diyos-diyosang si Molec,

bakit kayo nakatira sa mga bayan

ng lupain ni Gad?

²Darating ang araw,” sabi ng Panginoon ,

“na ipapasalakay ko

sa mga kaaway ang Rabba.

Wawasakin ang lungsod nʼyong ito

pati ang mga baryo sa palibot ay susunugin.

Sa ganitong paraan,

mapapalayas ng mga taga-Israel

ang mga nagpalayas sa kanila,”

sabi ng Panginoon .

³“Umiyak kayo nang malakas,

kayong mga taga-Hesbon

dahil wasak na ang Ai.

Umiyak din kayong mga taga-Rabba.

Magdamit kayo ng damit na sako

at magparooʼt parito sa gilid ng pader

upang ipakita ang inyong pagluluksa.

Sapagkat bibihagin ang diyos-diyosan nʼyong si Molec

pati ang mga pari at pinuno niya.

⁴Kayong mga taksil, bakit ninyo ipinagyayabang

ang inyong masaganang

mga kapatagan?

Nagtitiwala kayo sa inyong kayamanan

at sinasabi ninyong

walang sasalakay sa inyo.

⁵Magpapadala ako

sa inyo ng mga kaaway

mula sa mga bansa sa palibot ninyo

upang takutin kayo,”

sabi ng Panginoong Diyos

ng mga Hukbo.

“Palalayasin nila kayo sa inyong lupain

at walang sinumang makakatulong sa inyo.

⁶“Ngunit darating ang araw

na ibabalik ko kayamanan

ng mga Amonita,”

sabi ng Panginoon .

Ang Mensahe tungkol sa Edom

⁷Ito ang sinabi ng Panginoong Diyos ng mga Hukbo tungkol sa Edom:

“Nasaan na ang marurunong sa Teman?

Wala na bang natitirang marunong magpayo?

⁸Kayong mga nakatira sa Dedan tumakas kayo

at magtago sa malalalim na kuweba.

Sapagkat padadalhan ko ng kapahamakan

ang mga lahi ni Esau

sa oras na parusahan ko sila.

⁹Hindi baʼt ang mga namimitas ng ubas

ay nag-iiwan ng mga bunga?

Hindi baʼt ang mga magnanakaw

ay kumukuha rin lang

ng anumang magugustuhan nila?

¹⁰Ngunit kukunin ang lahat ng ari-arian

ng mga angkan ni Esau.

Kukunin ko ang takip ng pinagtataguan nila

upang hindi na sila makapagtago.

Mamamatay ang mga anak,

kamag-anak at mga kapitbahay nila.

Walang matitira sa kanila.

¹¹Ngunit maiiwan sa akin ang mga ulila nʼyo

dahil ako ang kakalinga sa kanila.

At ang mga biyuda nʼyo ay makakaasa sa akin.”

¹²Sinabi pa ng Panginoon , “Kung ang mga walang kasalanan ay nagdurusa, kayo pa kaya? Tiyak na parurusahan kayo.

¹³Isinusumpa ko sa sarili ko na ang Bosra ay mawawasak. Magiging nakakatakot ang kalagayan nito, at kukutyain at susumpain ito. Ang lahat ng bayan nito ay magiging wasak magpakailanman. Ako, ang Panginoon , ang nagsasabi nito.”

¹⁴Narinig ko ang balita mula sa Panginoon

na nagpadala siya ng mga sugo

sa mga bansa

upang paghandain sila sa digmaan

at hikayatin silang salakayin

ang bansa ng Edom.

¹⁵Sapagkat sinabi ng Panginoon

sa mga taga-Edom,

“Gagawin ko kayong mas mababa

kaysa sa ibang mga bansa,

at hahamakin kayo ng sangkatauhan.

¹⁶Ipinagmamalaki ninyong

kayoʼy nakatira sa batuhan

at matataas na lugar.

Ngunit sa pagmamataas

at pananakot ninyong ito sa iba,

dinadaya lamang ninyo ang inyong sarili.

Sapagkat kahit na naninirahan kayo

sa pinakamataas na lugar katulad

ng pinagpupugaran ng agila,

ibabagsak ko pa rin kayo,”

sabi ng Panginoon .

¹⁷Sinabi pa ng Panginoon ,

“Magiging malagim

ang kalagayan ng Edom.

Ang lahat ng dumadaan ay mangingilabot

at halos hindi makapaniwala

sa nangyari sa bansang ito.

¹⁸Kung paanong nawasak ang Sodoma

at Gomora at ang mga bayan

sa palibot nito,

ganoon din ang mangyayari sa Edom.

At wala nang taong maninirahan dito,”

sabi ng Panginoon .

¹⁹Bigla kong sasalakayin ang Babilonia

katulad ng leon na galing

sa kagubatang malapit sa Ilog Jordan,

sasalakay patungo sa pastulan

ng maraming tupa.

Magsisitakas sila,

at pipili ako ng taong mamamahala sa Edom.

Sino ang maitutulad sa akin?

Sino ang mangangahas na kalabanin ako?

Sino ang pinunong makakalaban sa akin?

²⁰Kaya pakinggan ninyo ang binabalak gawin

ng Panginoon laban sa Edom

pati sa mga mamamayan ng Teman:

Bibihagin ko ang mga anak nila

at gigibain ang mga tahanan nila.

²¹At dahil sa matinding pagkawasak ng Edom,

mayayanig ang lupa

at ang iyakan ng mga tagaroon ay maririnig

hanggang sa Dagat na Pula.

²²Tingnan nʼyo! Ang kaaway ay parang agila

na lumilipad na dadagit sa mga taga-Bosra.

Sa panahong iyon, matatakot

at magiging parang babaeng

malapit nang manganak

ang mga sundalo sa Edom.

Ang Mensahe tungkol sa Damasco

²³Ito ang mensahe tungkol sa Damasco:

“Natakot ang mga taga-Hamat at taga-Arpad

sa masasamang balita na kanilang narinig.

Naguguluhan at nanlulupaypay sila,

at hindi mapalagay katulad ng maalong dagat.

²⁴Nanghihina ang mga taga-Damasco

at tumakas sila dahil sa takot.

Takot at sakit ng damdamin

ang nararamdaman nila

na para bang babaeng malapit nang manganak.

²⁵Ang tanyag at masayang lungsod ng Damasco[#49:25 : O kinalulugdan ko.]

ay itinakwil.

²⁶Ang mga kabataan niyang lalaki

ay mamamatay sa mga lansangan

pati ang lahat ng kanyang kawal,”

wika ng Panginoong Diyos ng mga Hukbo.

²⁷“Susunugin ko ang mga pader ng Damasco,

pati ang matitibay na palasyo

ni Haring Ben-hadad.”

Ang Mensahe tungkol sa Kedar at Hazor

²⁸Ito ang sinabi ng Panginoon tungkol sa Kedar at mga kaharian ng Hazor na sinalakay ni Haring Nebucadnezar ng Babilonia:

“Humanda kayo at salakayin ninyo ang Kedar.

Lipulin ninyo ang mga taong ito ng silangan.

²⁹Ang mga tolda, kawan, mga ari-arian,

at mga kamelyo nila ay sasamsamin.

Sisigaw sila, ‘Napapaligiran tayo

ng mga nakakatakot nating kaaway.’

³⁰“Mga taga-Hazor, magmadali kayo

at tumakas!”

sabi ng Panginoon .

“Magtago na kayo sa mga kuweba.

Nagplano ng masama laban sa inyo

si Haring Nebucadnezar ng Babilonia.

³¹“Lusubin ninyo ang mga taong

namumuhay nang tiwasay

at hindi nababalisa,”

sabi ng Panginoon .

“Walang trangka ang pintuan ng lungsod nila,

at nabubuhay sila na sila-sila lang.

³²Ang mga kamelyo nila

at ang lahat ng kanilang kawan

ay magiging inyo.

Ikakalat ko ang mga taong ito

na nakatira sa malayong lugar

at ipapadala ko sa kanila

ang kapahamakan mula sa kung saan-saan,”

sabi ng Panginoon .

³³“Magiging malungkot

ang Hazor magpakailanman

at walang taong maninirahan doon

kundi mga asong-gubat.”

Ang Mensahe tungkol sa Elam

³⁴Ito ang salita ng Panginoon na ipinahayag niya kay propeta Jeremias tungkol sa Elam noong nagpasimulang maghari si Zedequias sa Juda.

³⁵Sinabi ng Panginoong Diyos ng mga Hukbo,

“Papatayin ko ang mga tagapana ng Elam,

ang pinakamahusay nilang mga kawal.

³⁶Sasalakayin ang Elam ng mga kaaway

mula sa lahat ng panig,

at ikakalat ko ang kanyang mga mamamayan

sa lahat ng dako.

Bibihagin sila sa lahat ng bansa

sa buong daigdig.

³⁷Lilipulin ko ang mga taga-Elam

sa pamamagitan ng

kanilang mga kaaway

na nais pumatay sa kanila.

Talagang ipapadala ko sa kanila

ang kapahamakan

dahil sa matindi kong galit sa kanila,”

sabi ng Panginoon .

“Ipapasalakay ko sila sa kanilang mga kaaway

hanggang sa mawala silang lahat.

³⁸Papatayin ko ang hari

at ang mga pinuno ng Elam,

at itatayo ko roon ang aking trono,”

sabi ng Panginoon .

³⁹“Ngunit darating ang araw

na ibabalik ko ang Elam

sa mabuti niyang kalagayan,”

sabi ng Panginoon .