Juan 21

Nagpakita si Hesus sa Kanyang Pitong Alagad

¹Pagkalipas ng ilang araw, muling nagpakita si Hesus sa mga alagad niya sa may lawa ng Tiberias. Ganito ang nangyari:

²Magkakasama noon sina Simon Pedro, Tomas (na tinatawag ding Kambal), Natanael na taga-Cana na bayan sa Galilea, mga anak ni Zebedeo, at dalawa pang mga alagad.

³Sinabi ni Simon Pedro sa kanila, “Mangingisda ako.” Sumagot sila, “Sasáma kami.” Kaya sumakay sila sa bangka at pumalaot. Ngunit wala silang nahuli nang gabing iyon.

⁴Nang madaling-araw na, may nakita silang nakatayo sa dalampasigan, ngunit hindi nila nakilala na si Hesus iyon.

⁵Tinawag sila ni Hesus, “Mga kaibigan, may huli ba kayo?”[#21:5 : Sa literal, Mga anak.]

Sumagot sila, “Wala po.”

⁶Sinabi ni Hesus sa kanila, “Ihulog nʼyo ang lambat sa gawing kanan ng bangka at makakahuli kayo.” Iyon nga ang ginawa nila, at nang hilain nila iyoʼy hindi nila maitaas ang lambat sa dami ng nahuli nilang isda.

⁷Sinabi kay Pedro ng alagad na malapit sa puso ni Hesus, “Ang Panginoon iyon!” Nang marinig ito ni Pedro, isinuot niya ang panlabas na kasuotan (dahil hinubad niya ito bago nanghuli ng isda), at tumalon sa tubig.

⁸Ang ibang mga alagad na nasa bangka ay bumalik din sa dalampasigan na hila-hila ang lambat na puno ng isda, dahil mga 90 metro lang ang layo nila sa pampang.

⁹Pagdating nila sa dalampasigan, nakita nila roon ang nagbabagang uling na may nakasalang na isda, at ilang tinapay.

¹⁰Sinabi ni Hesus sa kanila, “Magdala kayo rito ng ilang isda na nahuli ninyo.”

¹¹Kaya sumampa sa bangka si Pedro at hinila papunta sa pampang ang lambat na puno ng malalaking isda na 153 lahat-lahat. Ngunit kahit ganoon karami ang isda, hindi nasira ang lambat.

¹²Sinabi ni Hesus sa kanila, “Halikayoʼt mag-almusal.” Wala ni isa sa mga alagad ni Hesus ang nangahas magtanong kung sino siya dahil alam nila na siya ang Panginoon.

¹³Kumuha si Hesus ng tinapay at ibinigay sa kanila. Ganoon din ang ginawa niya sa isda.

¹⁴Ito na ang ikatlong pagpapakita ni Hesus sa mga alagad niya pagkatapos niyang mabuhay muli.

Si Hesus at si Pedro

¹⁵Pagkatapos nilang mag-almusal, sinabi ni Hesus kay Simon Pedro, “Simon na anak ni Juan, mahal mo ba ako nang higit sa mga ito?”

Sumagot si Pedro, “Opo, Panginoon, alam nʼyo pong mahal ko kayo.”

Sinabi ni Hesus, “Alagaan mo ang aking mga batang tupa.”

¹⁶Muling sinabi ni Hesus, “Simon na anak ni Juan, mahal mo ba ako?”

Sumagot si Pedro, “Opo, Panginoon, alam nʼyo pong mahal ko kayo.”

Sinabi ni Hesus, “Alagaan mo ang aking mga tupa.”

¹⁷Sa ikatlong ulit ay sinabi ni Hesus, “Simon na anak ni Juan, mahal mo ba talaga ako?”

Nasaktan si Pedro dahil tatlong beses na siyang tinanong kung mahal niya si Hesus. Kaya sumagot siya, “Panginoon, alam nʼyo po ang lahat ng bagay. Alam nʼyo rin pong mahal ko kayo.”

Sinabi sa kanya ni Hesus, “Alagaan mo ang aking mga tupa.

¹⁸Sinasabi ko sa iyo ang totoo, noong bata ka pa, ikaw mismo ang nagbibihis sa sarili mo, at pumupunta ka kung saan mo gusto. Ngunit pagtanda mo, iuunat mo ang mga kamay mo at iba na ang magbibihis sa iyo, at dadalhin ka sa lugar na hindi mo gusto.”

¹⁹Sinabi ito ni Hesus upang ipahiwatig kung anong klaseng kamatayan ang daranasin ni Pedro upang maparangalan ang Diyos. Pagkatapos, sinabi ni Hesus kay Pedro, “Sumunod ka sa akin.”

²⁰Nang lumingon si Pedro, nakita niyang sumusunod sa kanila ang alagad na malapit sa puso ni Hesus. (Siya ang alagad na nakasandal kay Hesus nang naghahapunan sila, at siya ang nagtanong kay Hesus ng, “Panginoon, sino po ang magkakanulo sa inyo?”)

²¹Nang makita siya ni Pedro, nagtanong siya, “Panginoon, paano naman po siya?”

²²Sumagot si Hesus, “Kung gusto ko siyang mabuhay hanggang sa pagbalik ko, ano naman saʼyo? Sumunod ka lang sa akin.”

²³Dahil dito, kumalat sa mga kapatid sa pananampalataya ang balita na ang alagad na ito ay hindi mamamatay. Ngunit hindi sinabi ni Hesus na hindi siya mamamatay. Ang sinabi lang niya, “Kung gusto ko siyang mabuhay hanggang sa pagbalik ko, ano naman saʼyo?”

²⁴Ako ang alagad na nagpapatotoo sa mga bagay na ito, at sumulat sa mga ito. Alam namin na totoo ang kanyang pahayag.

²⁵Marami pang mga bagay ang ginawa ni Hesus. Kung isusulat ang lahat ng ito, palagay koʼy hindi magkakasya sa buong mundo ang lahat ng aklat na maisusulat.