Job 13

¹“Nakita koʼt napakinggan

ang lahat ng sinabi ninyo,

at itoʼy aking naunawaan.

²Ang alam ninyo ay alam ko rin.

Hindi kayo nakahihigit sa akin.

³Ngunit hindi na ako makikipagtalo sa inyo

tungkol sa kalagayan ko.

Sa aking Diyos na Makapangyarihan ko na lamang

ito idudulog.

⁴Sapagkat pinagsisikapan ninyong

gamutin ako ng kasinungalingan.

Lahat kayoʼy parang manggagamot

na walang silbi.

⁵Mas mabuti pang tumahimik na lang kayo.

Iyan ang pinakamabuti nʼyong gawin.

⁶Pakiusap naman!

Pakinggan ninyo ang katuwiran ko.

⁷Ipagtatanggol nʼyo ba ang Diyos

sa pamamagitan ng pagsisinungaling?

⁸Kumakampi ba kayo sa kanya?

Ipagtatanggol ba ninyo siya

sa harap ng Diyos?

⁹Kung siyasatin kaya kayo ng Diyos,

may kabutihan kaya siyang

makikita sa inyo?

Huwag ninyong isipin

na madadaya ninyo siya

tulad ng pandaraya ninyo sa mga tao.

¹⁰Tiyak na sasawayin kayo ng Diyos

kahit na kinakampihan ninyo siya.

¹¹Hindi ba kayo natatakot

sa kapangyarihan niya?

¹²Ang mga binabanggit nʼyong kasabihan

ay walang kabuluhan;

itoʼy parang abo.

Ang mga katuwiran nʼyo

ay marupok gaya ng palayok.

¹³“Tumahimik kayo habang nagsasalita ako,

at anuman ang mangyari sa akin,

bahala na.

¹⁴Nakahanda akong itaya ang lahat,

maging ang aking buhay.

¹⁵Kahit patayin pa ako ng Diyos.

Ano pa ba ang mawawala sa akin?

Ngunit ipagtatanggol ko pa rin

ang aking sarili sa kanya.

¹⁶Baka sakaling sa pamamagitan nito

ay maligtas ako,

dahil walang masamang tao

na makakalapit sa kanya.

¹⁷Makinig kayong mabuti

sa aking sasabihin;

at ang mga salita koʼy inyong dinggin.

¹⁸Ngayong handa na akong ipagtanggol

ang sarili ko;

alam kong mapapatunayang

wala akong kasalanan.

¹⁹Sino ang makakapagparatang

na nagkasala ako?

Kung mayroon nga,

mananahimik na lang ako

hanggang sa mamatay.

²⁰“O Diyos, dalawang bagay lang

ang hinihiling ko sa inyo,

na kung ibibigay nʼyo sa akin

ay hindi na ako magtatago sa inyo:

²¹Tigilan nʼyo na ang pagpaparusa sa akin

at huwag nʼyo na akong takutin

ng mga nakakatakot na parusa ninyo.

²²Kausapin nʼyo ako

at sasagot ako,

o kayaʼy ako ang magsasalita sa iyo

at sagutin nʼyo ako.

²³Anu-ano po ba ang mga nagawa kong

pagkakamali at kasalanan?

Sabihin nʼyo po sa akin

ang aking pagkakamali

at mga kasalanan.

²⁴Bakit nʼyo ako tinatalikuran

at itinuturing na kaaway?

²⁵Bakit nʼyo ako tinatakot at hinahabol?

Para lang akong dahon o tuyong ipa

na tinatangay ng hangin.

²⁶Inililista nʼyo ang mapapait

na paratang laban sa akin

at isinasama nʼyo pa ang lahat

ng kasalanan ko

noong bata pa ako.

²⁷Para nʼyong ikinadena

ang aking mga paa.

Bawat hakbang koʼy

inyong binabantayan,

at pati bakas ng paa koʼy

inyong sinusundan.

²⁸“Kaya para na akong

isang bagay na nabubulok

o isang damit na sinisira

ng gamo-gamo.”