Job 19

Sumagot si Job

¹Muling sumagot si Job,

²“Hanggang kailan ninyo ako pahihirapan,

at sasaktan sa mga sinasabi ninyo?

³Paulit-ulit ninyo akong iniinsulto.

Hindi na kayo nahiya

sa mga ginagawa ninyo

sa akin?

⁴Kung talagang nagkasala ako,

problema ko na iyon.

⁵Ang akala ninyoʼy mas magaling kayo

kaysa sa akin,

at ginagamit ninyo ang kahihiyan ko

bilang patunay na nagkasala ako.

⁶Dapat ninyong malaman,

ang Diyos ang humatol sa akin

nang hindi tama.

At nahuli ako ng kanyang lambat

na nakapalibot sa akin.

⁷“Tumawag ako

at humingi ng tulong

ngunit walang sumagot sa akin.

Humingi ako ng katarungan

ngunit walang nagbigay sa akin.

⁸Hinarangan ng Diyos

ang dinadaanan ko

upang hindi ako makadaan.

Tinakpan din niya ito ng kadiliman.

⁹Inalis niya ang aking karangalan

at sinira ang mabuti kong pangalan.

¹⁰Pinahirapan niya ako

saanman ako bumaling

na halos ikamatay ko na.

Inalis niya ang pag-asa ko

na parang punongkahoy na binunot.

¹¹Labis ang galit niya sa akin

at itinuring niya akong kaaway.

¹²Pinadalhan niya ako ng mga sundalo

para salakayin at palibutan ang aking tolda.

¹³“Inilayo niya sa akin

ang aking mga kamag-anak;

at nilayuan na ako

ng aking mga kakilala.

¹⁴Wala na ang lahat ng taong malapít sa akin.

Pati mga kaibigan koʼy nilimot na ako.

¹⁵Hindi na ako kilala ng aking mga bisita

at mga babaeng alipin.

Itinuring na nila akong dayuhan.

¹⁶Kapag tinatawag ko ang aking alipin,

hindi na niya ako pinapansin,

kahit makiusap pa ako.

¹⁷Ang asawa koʼy nababahuan sa hininga ko

at ang mga kapatid kong lalaki

ay nandidiri sa akin.

¹⁸Hinahamak ako kahit ng mga batang paslit.

Kapag nakikita nila ako,

pinagtatawanan nila ako.

¹⁹Lahat ng matalik kong kaibigan

ay nasusuklam sa akin.

Pati mga mahal ko sa buhay

ay lumayo na rin.

²⁰Butoʼt balat na lang ako

at halos mamamatay na.

²¹“Maawa kayo sa akin,

mga kaibigan ko,

dahil pinahihirapan ako ng Diyos.

²²Bakit ninyo ako inuusig

tulad ng ginagawa ng Diyos sa akin?

Hindi pa ba sapat

ang pagpapahirap ninyo sa akin?

²³“Mabuti sana kung isinulat sa aklat

ang mga sinabi ko,

²⁴o di kayaʼy iniukit ito sa bato

upang hindi mabura magpakailanman.

²⁵Alam kong buháy ang aking Tagapagligtas

at sa bandang huli

ay darating siya dito sa lupa.

²⁶Pagkaalis ko sa katawang ito

at mabulok ang mga laman ko,

makikita ko na ang Diyos.

²⁷Makikita ko siya nang harapan

at hindi na siya iba sa akin.

Labis na akong nananabik

na makita siya.

²⁸“Kung sasabihin ninyo,

‘Patuloy natin siyang paratangan

dahil siya mismo ang ugat

ng mga kaguluhan.’

²⁹Katakutan ninyo ang talim ng tabak,

sapagkat ito ay parusang nararapat

dulot ng kanyang matinding poot,

upang malaman ninyong may paghahatol.”